Tags-Khoon

besh-qīmat hai bahut surḳhī-e-ḳhūn-e-dil bhī
rū-ba-rū jaam meñ baada ho zarūrī to nahīñ

ḳhūn-e-āshiq se ye parhez use
āshnā-e-kaf-e-pā kījiye bas

ishq se hotī hai is shiddat kī garmī ḳhuun meñ
khaultā hai jaise dariyā dopahar ko june meñ

maltā hai ai nigār kaf-e-pā kuuñ apne aah
kyā tū ne mere ḳhuun ko rañg-e-hinā kiyā

hijr kahtā hai ḳhuun piinā hai
maas jabki use khilātā huuñ

ḳhuun niklegā terī āñkhoñ se
maiñ tujhe karbalā sunātā huuñ

raushnā.ī na sahī 'ālam' likhegā dāstāñ
kaam apne ek din ḳhūn-e-jigar aa jā.egā

rag rag meñ jab ḳhuun kī būñdeñ bulbul ban kar chahak uThīñ
phir dil-e-'hāfiz' kyuuñ kar sādhe siine ke shīrāz meñ chup

ḳhuun meñ nashsha-e-iz.hār kā ḳhanjar paivast
darmiyāñ chup kī ye talvār kahāñ se aa.ī

ḳhaak aur ḳhuun se ik sham.a jalā.ī hai 'nushūr'
maut se ham ne bhī sīkhī hai hayāt-ārā.ī

ḳhūn-e-āshiq par kamar bāñdhe hue haiñ ḳhūb-rū
teġh-e-misrī halq par hotī jo sharbat māñgtā

zaḳhm-e-dil aur harā ḳhūn-e-tamannā se huā
tishnagī kā mirī āġhāz hī dariyā se huā

kab talak ḳhuun rulāte hue manzar dekhe
niiñd ko aañkh zarā der ko ab māñge hai

riñd jhijhke to balā-noshoñ ne mahsūs kiyā
mai nahīñ jaam meñ ḳhūn-e-ġhurabā ho jaise

dasht meñ jaltī haiñ tā-hadd-e-nazar yuuñ sham.eñ
sar-e-har-ḳhār pe ḳhūn-e-shohadā ho jaise

ḳhūn-e-dil apnā ba-nām-e-añgbīñ
apne paimāne meñ Dhaltā jā.egā

jalne ko to yuuñ ḳhuun bhī jal jā.egā lekin
paanī meñ zarā aag lagāo to bane baat

hamāre ḳhuun kī qīmat pe jo ḳharīdī ga.ī
usī bahār-e-gulistāñ meñ jal bujhe ham log

umr bhar manzar-nigārī ḳhuun meñ utrī rahī
phir bhī āñkhoñ ke muqābil ek dariyā rah gayā