Tags-Khoon

hamāre ḳhuun se us shoḳh ke rañg-e-hinā aa.e
payām-e-shauq le kar koī un tak dūsrā pahuñche

kuchh to subūt-e-ḳhūn-e-tamannā kahīñ mile
hai dil tahī to aañkh ko bhar jaanā chāhiye

zindagī kyā hai sabr karnā hai
ḳhuun kā ghūñT pī ke marnā hai

dil-e-muztar kā ḳhuun karnā hai
nāla-e-ġham meñ dard bharnā hai

dhartī kī sulagtī chhātī se bechain sharāre pūchhte haiñ
tum log jinheñ apnā na sake vo ḳhuun ke dhāre pūchhte haiñ

arzāñ hai musht-e-ḳhāk se insān kī hayāt
tahzīb-e-qatl-o-ḳhūn meñ ab zindagī kī ḳhair

ḳhūn-e-jigar ke saath kahīñ jī chalā na jaa.e
ronā zarā tū dīda-e-ḳhūñ-bār dekh kar

likkhī ga.ī jo mere hī ḳhvāboñ ke ḳhuun se
raahī mirā hī naam nahīñ us kitāb meñ

zulmateñ umDīñ kuchh aise khā ga.iiñ harfoñ kā nuur
ḳhūn-e-dil se kī thī kuchh raḳhshandagī dīvār par

ai ta.ana-zanoñ do chaar baras tum bol liye ab dekhte jaao
shamshīr-e-suḳhan kis haath meñ hai kis ḳhuun meñ hiddat jaagī hai

ab ḳhuun ko mai qalb ko paimāna kahā jaa.e
is daur meñ maqtal ko bhī mai-ḳhāna kahā jaa.e

dil ko kis bū-qalamoñ jalve ne hai ḳhuun kiyā
ashk ā.ankhoñ se jo ye rañg-ba-rañg aate haiñ

ragoñ kā ḳhuun rafta rafta ThanDā ho chalā 'maikash'
mire dard-e-jigar ko aa gayā kāfūr ho jaanā

yahāñ pe ḳhuun bah gayā vahāñ pe laash gir paḌī
na jaane kaun shaḳhs thā safar tamām kar gayā

pesh-e-dāvar to karūñ ḳhuun kā da.avā lekin
mere qātil ko sar-e-hashr nadāmat hogī

mausam-e-gul agar is haal meñ aayā bhī to kyā
ḳhūn-e-gul chehra-e-gulzār pe mal jā.egā

ye jazr-o-mad hai pādāsh-e-amal ik din yaqīnī hai
na samho ḳhūn-e-insāñ bah gayā hai rā.egāñ ho kar

ḳhūn-e-dil apnā pilāyā jo ġhazal ko maiñ ne
tab kahīñ jā ke zamāne ne pazīrā.ī kī

har-dam vo mujh ko dekh ke abrū chaḌhāte haiñ
pyāsā hai ḳhanjar un kā mire ḳhūn-e-nāb kā

saaqī tirī mahfil ko rañgīn kiyā jis ne
vo ḳhuun hai taqve kā yā jalva-e-mīnā hai