Tags-Khoon

ḳhuun pī pī ke pilā kartī hai añgūr kī bel
gar yahī rañg-e-tamannā thā chalo yūñhī sahī

maarā hai dikhā ke dast-e-rañgīñ
shāhid mire ḳhuun kī hinā hai

sho.ala-zār-e-gul se guzre to sar-e-āġhāz hī
ik sharar āñkhoñ se utrā ḳhuun meñ hal ho gayā

kū-ba-kū hotā nahīñ yā dar-ba-dar hotā nahīñ
ḳhūn-e-nāhaq kis taraf shām-o-sahar hotā nahīñ

siyāsī rahnumāoñ kī badaulat
hamārā ḳhuun sastā ho gayā hai

ḳhūn-e-dil hotā rahā ḳhūn-e-jigar hotā rahā
ye tamāshā ishq meñ shām-o-sahar hotā rahā

aaj guzre hue lamhoñ ko pukārā jaa.e
dil ko phir ḳhūn-e-tamannā se sañvārā jaa.e

raushnī apne gharoñdoñ meñ chhupī thī varna
shahr ke shahr pe shab-ḳhūn na maarā jaatā

ḳhuun jamtā sā rag-o-pai meñ hue shal ehsās
dekhe jaatī hai nazar haul tamāshā kaisā

chalīñ garm āñdhiyāñ sūraj bhī chamkā ḳhāk-e-maqtal par
vahī ḳhūn-e-shahīdāñ kī namī ma.alūm hotī hai

ḳhuun kitnā bahā thā maqtal meñ
merī āñkhoñ meñ ḳhuun utarne tak

ḳhvāhish hamāre ḳhuun kī labrez ab bhī hai
kuchh narm paḌ ga.ī hai magar tez ab bhī hai

kyā sitam hai shab-e-vāda vo hinā malte haiñ
rañg laa.e na kahīñ ḳhūn-e-tamannā ho kar

ḳhūn-e-jigar se sīñchūñgā gulzār-e-tamannā us ke liye
bāġh-e-hayāt meñ gul-e-mohabbat aa kar mire khilā.e to

bhīge sāhiloñ kī havā meñ ḳhuun hī ḳhuun thā
jhīloñ ke ābād kināre mujhe banjar kar ga.e

dil ko masal masal ke zarā haath sūñghiye
mumkin nahīñ ki ḳhūn-e-tamannā kī bū na ho

agar sharmā rahā hai mehr-e-tābāñ husn-e-jānāñ se
shafaq bhī to ḳhajil hai surḳhi-e-ḳhūn-e-shahīdāñ se

gavāhī ke liye kaafī rahegā
maiñ apnā ḳhuun muñh pe mal rahā huuñ

jo qahqahoñ aur qumqumoñ se sajī-dhajī hai usī galī se guzar ke dekho
añdhere zīnoñ pe sar-ba-zānū jo bekasī ḳhuun thūktī hai vo shā.irī hai

yuuñ qatre mire ḳhuun ke us teġh se guzre
juuñ fauj kā pul par se ho dushvār utārā