Tags-Khoon

huā ḳhuun siine meñ dil hasratoñ se
tamannā.eñ ban kar ḳhayāloñ ne maarā

ajiib ḳhvāb thā āñkhoñ meñ ḳhuun chhoḌ gayā
ki niiñd guzrī hai mujh ko zalīl karte hue

na is qadar bhī takalluf se kaam lo ki sharāb
jo aa.e bhī to nazar ḳhūn-e-ārzū aa.e

ġharīb bhuuk kī Thokar se ḳhuun ḳhuun hue
kisī amiir ko ab to lahū kī baas aa.e

kyārī meñ ḳhuun Daalā paudā lagāyā jis ne
vo hī nikal gayā hai kāshāna-e-chaman se

vo jis ne ḳhvāb mire pal meñ qatl kar Daale
ḳhirāj māñgne aayā hai ḳhuun kā mujh se

Thokareñ khātī phiregī shab-e-yaldā-e-firāq
ḳhuun ro.egī har ik taaza balā mere ba.ad

galiyoñ meñ bārūd kī bū
yā phir ḳhuun mahaktā hai

kisī kā ḳhuun gardan par na chaḌh jaa.e
ye choTī kis liye pīchhe paḌī hai

kisī kā ḳhūn-e-nāhaq sar na ho jaa.e
ye choTī kis liye pīchhe paḌī hai

chhupegā kab hamārā ḳhūn-e-nāhaq
ye choTī kis liye pīchhe paḌī hai

mirī raftār duniyā se bahut hī tez hotī hai
ragoñ meñ ḳhuun kī aksar ravānī bhuul jaatā huuñ

mirī zindagī kī urūs-e-nau tujhe is kī koī ḳhabar bhī hai
vo thī kis kī surḳhī-e-ḳhūn-e-dil tirī maañg meñ jo bharī rahī

khā ke ġham ḳhvān-e-ishq ke mehmān
haath ḳhūn-e-jigar se dhote haiñ

ḳhūn-e-mazlūm akārat to nahīñ jā saktā
zaḳhm-e-gul-rez ne phūloñ se sajāyā hai mujhe

aish-e-rafta ne bahut ḳhuun rulāyā hai mujhe
phuul kī sej ne kāñToñ pe sulāyā hai mujhe

ḳhuun hī ḳhuun nazar aatā hai tā-hadd-e-nazar
kis ke naqsh-e-kaf-e-pā arsh pe lahrā.e haiñ

vo ḳhuun kī maujeñ haiñ har ik sū ki kamar tak
farḳhanda jamāloñ kī qabā Duub chalī hai

ḳhuun piitī rahī baḌhtī rahī koñpal koñpal
chhāñv tāroñ kī shagūfoñ ko numū detī rahī