Tags-Khuda

jo sabz-bāġh-e-tamannā pe pher de paanī
ḳhudā bachā.e ham aisī nazar se dar-guzre

dekhā baġhaur aib se ḳhālī nahīñ koī
bazm-e-jahāñ meñ sab haiñ ḳhudā ke sañvāre log

ishq-e-butāñ hai ḳhvāb-e-farāmosh ai ḳhudā
aayā hai phir ḳhayāl tirī yaad kī taraf

haañ ḳhudā hai, is meñ koī shak kī gunjā.ish nahīñ
is se tum ye mat samajh lenā ḳhudā maujūd hai

shukr ḳhudā kā ham karte haiñ
kaam aayā kaam aane vaalā

Daal do bahr-e-havādis meñ ḳhudā par kashtī
nā-ḳhudā dām-e-tavahhum meñ giraftār sahī

mujh se kahtā hai mirā shoḳh ki iqbāl-'matīn'
tum rahe raat kahāñ ye to ḳhudā jaane hai

kasī haiñ bhabtiyāñ masjid meñ rīsh-e-vā.iz par
kahīñ na merī tabī.at ḳhudā gavāh rukī

kahte the ham na dekh sakeñ roz-e-hijr ko
par jo ḳhudā dikhā.e so nā-chār dekhnā

sīna-e-sañg meñ DhūñDhtā hai gudāz
de ḳhudā dil ko ik aur umr-e-darāz

sikhā diyā mujhe bach bach ke rāsta chalnā
ḳhudā bhalā kare ai 'shād' nukta-chīnoñ kā

bahisht-e-dahr hai apnā vatan ḳhudā kī qasam
judā judā hai tarāna sabhī mahīnoñ kā

kufr ek rañg-e-qudrat-e-be-intihā meñ hai
jis but ko dekhtā huuñ vo yād-e-ḳhudā meñ hai

umr to saarī gañvā.ī ho na paa.e insāñ
par ḳhudā banñe ko phir bhī to aḌe haiñ saare

ham apnī be-ḳhudī-e-shauq par nisār rahe
ḳhudī ko DhūñDh liyā jab hameñ ḳhudā na milā

ḳhudā ko DhūñD rahā thā kahīñ ḳhudā na milā
zahe-nasīb ki bande ko mudda.ā na milā

jo baat baat pe khātā rahā ḳhudā kī qasam
qasam ḳhudā kī vahī aadmī to jhūTā thā

mire ḳhudā ne mire sab gunāh baḳhsh diye
kisī kā raat ko yuuñ maiñ ne intizār kiyā

charāġh-e-bazm-e-ḳhudā huā hai ḳhudā ne mahbūb use kahā hai
ye shaam se lau lagī hai dil ko ki dekhne us bashar ko chaliye

na chāhiye kuchh adam ko le kar nikaliye hastī se jaan de kar
safar jo liije rah-e-ḳhudā meñ luTā ke zād-e-safar ko chaliye