Tags-Khuda

vā.izā mastoñ kā dil haigā ḳhudā kā ghar sarīh
toḌ mat us ke ta.iiñ sañg-sitam se kar azaab

ġharqāb kar diyā thā hameñ nā-ḳhudāoñ ne
vo to kaho ki ek hamārā ḳhudā bhī hai

ḳhudā kā ghar bhī hai dil meñ butoñ kī chaah bhī hai
sanam-kada bhī hai dil apnā ḳhānqāh bhī hai

ḳhudā jaane kahāñ us kī rifāqat ho ga.ī zaḳhmī
ki shab meñ ik parinda chīḳhtā aksar nikaltā hai

guzarne vaalā har ik lamha merā qātil hai
ḳhudā ke vāste maaro ise bachāo mujhe

'zafar' vahāñ ki jahāñ ho koī bhī had qaa.em
faqat bashar nahīñ hotā ḳhudā bhī hotā hai

kuchh aql ke matvāle kuchh ishq ke dīvāne
parvāz kahāñ tak hai kis kī ye ḳhudā jaane

zabāñ pe 'shahbāz' kī haiñ jaarī mudām shīrīñ-laboñ kī bāteñ
ḳhudā ne chāhā to nok-e-ḳhāma hamesha ratb-ul-lisāñ rahegī

ḳhudā ne muñh meñ zabān dī hai to shukr ye hai ki muñh se bolo
ki kuchh dinoñ meñ na muñh rahegā na muñh meñ chaltī zabāñ rahegī

ḳhudā kā naam koī le to chauñk uThte haiñ
mile haiñ ham ko vo rahbar ḳhudā ke raste meñ

mujhe be-nām kar detā hai 'ahmad'
ki naam apnā ḳhudā rakkhā hai us ne

bharosa kis qadar hai tujh ko 'aḳhtar' us kī rahmat par
agar vo shaiḳh-sāhib kā ḳhudā niklā to kyā hogā

ba-roz-e-hashr hākim qādir-e-mutlaq ḳhudā hogā
farishtoñ ke likhe aur shaiḳh kī bātoñ se kyā hogā

sadiyoñ se maiñ apne ko banāne meñ huuñ masrūf
banda huuñ magar ġhaur se dekho to ḳhudā huuñ

uḌā diyā hai jise chuum kar havā meñ 'nasīm'
use hamesha hifāzat meñ ai ḳhudā rakhnā