Tags-Khuda

apnī āñkhoñ meñ na jaane kab kā
ḳhvāb hai jis ko ḳhudā kahte haiñ

yaksāñ lageñ haiñ un ko to dair-o-haram baham
jo pūjte haiñ dil meñ ḳhudā-o-sanam baham

muflis ko ahl-e-zar ne bhī kyā kiyā diye fareb
apnī jafā kā hukm-e-ḳhudā naam rakh diyā

fitrat meñ aadmī kī hai mub.ham sā ek ḳhauf
us ḳhauf kā kisī ne ḳhudā naam rakh diyā

ḳhudā-na-karda tumhāre dil ko koī dukhā.e to kyā karoge
nigāheñ tum ne to aisī pherīñ ki jaise merā ḳhudā nahīñ hai

ḳhudā ne aaj tak us qaum kī hālat nahīñ badlī
na ho jis ko ḳhayāl aap apnī hālat ke badalne kā

ḳhudā kare ki khule ek din zamāne par
mirī kahānī meñ jo isti.āra ḳhvāb kā hai

apnī nā-karda-gunāhī kā sila bhī rakh le
dil ke ḳhāne meñ zarā ḳhauf-e-ḳhudā bhī rakh le

hañsī aa.ī to hai be-kaif sī lekin ḳhudā jaane
mujhe masrūr pā kar mere ġham-ḳhvāroñ pe kyā guzrī

mohabbat but-kade meñ chal ke us kā faisla kar de
ḳhudā merā ḳhudā hai yā ye mūrat hai ḳhudā merī

dam-e-āḳhir musībat kaaT do bahr-e-ḳhudā merī
tum aa kar dard ke parde meñ kar jaao davā merī

miyān-e-hashr ye kāfir baḌe itrā.e phirte haiñ
mazā aa jaa.e aise meñ agar sun le ḳhudā merī

ḳhudā se vaqt-e-duā ham savāl kar baiThe
vo but bhī dil ko zarā ab sambhāl kar baiThe

agar us kā mirā jhagḌā yahīñ tai ho to achchhā ho
ḳhudā jaane ḳhudā ke sāmne kal kyā na ho kyā ho

jo kisī kī sunā nahīñ ab tak
us ḳhudā ko na pūjte rahiyo

ḳhudā hī us chup kī daad degā ki turbateñ rauñde Dālte haiñ
ajal ke maare hue kisī se na bolte haiñ na chālte haiñ

hai itā.at ke liye apnā faqat ek ḳhudā
na ḳhudāoñ kī itā.at nahīñ hogī ham se

mujh se kuchh sunñe pe āmāda na thī ḳhalq-e-ḳhudā
umr-bhar us ne magar apnī sunā.ī mujh ko

shukr-e-ḳhudā ki naam hai ismat kā 'mus.hafī'
roz-e-jazā gavāh mire ishq-e-pāk kā

shaiḳh o panDit dharm aur islām kī bāteñ kareñ
kuchh ḳhudā ke qahr kuchh in.aam kī bāteñ kareñ