Tags-Khuda

terā qusūr-vār ḳhudā kā gunāhgār
jo kuchh ki thā yahī dil-e-ḳhāna-ḳharāb thā

jo mirī riyāzat-e-nīm-shab ko 'salīm' sub.h na mil sakī
to phir is ke ma.anī to ye hue ki yahāñ ḳhudā koī aur hai

jāniye kyā kyā madārij aur bhī karne haiñ tai
ham abhī zehn-e-ḳhudā-vandī meñ ik andesha haiñ

vo kyā ḳhudā kī parastish kareñge merī tarah
jo ek but bhī bahut soch kar banāte haiñ

tayyār raho har-dam marne pe kamar bāñdhe
dar-pesh-e-ḳhudā jaane kab ye safar aa jaa.e

bahr-e-ḳhudā ḳhāmosh raho bas dekhte jaao ahl-e-nazar
kyā laġhzīdā-qadam haiñ us ke kyā duzdīda-nigāhī hai

butoñ meñ nūr-e-zāt-e-kibriyā mālūm hotā hai
mujhe kuchh din se har patthar ḳhudā mālūm hotā hai

us kī anā ke but ko baḌā kar ke dekhte
miTTī ke aadmī ko ḳhudā kar ke dekhte

gunāhgāroñ meñ baiThe to inkishāf huā
ḳhudā se ab bhī bahut ḳhauf khāyā jaatā hai

yaad ḳhudā kī aa.ī us ko
jis ne but meñ Dhālī miTTī

abhī kitne marāhil aur haiñ merī masāfat ke
mujhe kuchh to batā de ai ḳhudā chaltā rahā huuñ maiñ

jo ik ḳhudā nahīñ miltā to itnā mātam kyuuñ
yahāñ to koī mirā ham-zabāñ nahīñ miltā

havas-bāzī nahīñ ye ishq-bāzī hai ḳhudā shāhid
mohabbat meñ hai shart-e-avvalīñ jī se guzar jaanā

ab vo apne ko ḳhudā samjhe to ġhalatī kyā hai
man ke mandir meñ use tum ne basāyā kyuuñ thā

ab aadmī kī jis pe musallat machine hai
ab zar kī justujū hai ḳhudā phir kabhī sahī

tū hamesha rahtā hai chīñ-bar-jabīñ afsurda dil
phir kisī kī bazm-e-ishrat meñ na jā bahr-e-ḳhudā

do javāñ dil jo mohabbat meñ kabhī paḌ jaa.eñ
kyā ye sach-much meñ ḳhudā kī hī ḳhatā hotī hai

maiñ apnī zaat kā hissa jise samajhtā huuñ
mire ḳhudā kī hai baḳhshish vo āgahī kā safar

mujh ko vaisā ḳhudā milā bilkul
maiñ ne 'ārif' kiyā gumāñ jaisā

ḳhudā jaane ye soz-e-zabt hai yā zaḳhm-e-nākāmī
kabhī hotī na thī siine meñ lekin ye jalan pahle