Tags-Khuda

haañ ḳhudā hai, is meñ koī shak kī gunjā.ish nahīñ
is se tum ye mat samajh lenā ḳhudā maujūd hai

mire ḳhudā maiñ tirī raah jis ghaḌī chhoḌūñ
usī ghaḌī se muqaddar ho dar-ba-dar merā

na ḳhudā hai na nāḳhudā hai koī
zindagī goyā sāneha hai koī

'momin' ḳhudā ke vāste aisā makāñ na chhoḌ
dozaḳh meñ Daal ḳhuld ko kū-e-butāñ na chhoḌ

ḳhudā bhī kaisā huā ḳhush mire qarīne par
mujhe shahīd kā darja milā hai jiine par

agar un ko puujā to kyā kufr hogā
ki but bhī ḳhudā ke banā.e hue haiñ

samjho agar to haiñ vahī sab se harīs-tar
tālib ḳhudā se jo dil-e-be-mudda.ā ke haiñ

itnā to jānte haiñ ki bande ḳhudā ke haiñ
aage havās gum ḳhirad-e-nā-rasā ke haiñ

mahbūb-e-ḳhudā ne tujhe nāyāb banāyā
qad sarv kiyā ruḳh gul-e-mahtāb banāyā

lagī hai mohr muqaddar kī daane daane par
ye ḳhush-mazāqī-e-shān-e-ḳhudā bhī ḳhuub rahī

paiham sujūd pā-e-sanam par dam-e-vidā
'momin' ḳhudā ko bhuul ga.e iztirāb meñ

nashsha-e-husn meñ sarshār chalā jaatā hai
shab-e-tārīk hai dildār ḳhudā ko sauñpā

na pūchho āh-e-mohabbat kī raḳhna-andāzī
ḳhudā gavāh hai apne hue haiñ begāne

mohabbat asl meñ kyā chiiz hai ḳhudā jaane
dahan meñ jitnī zabāneñ haiñ utne afsāne

jo āñkhoñ meñ phirtā hai phire āñkhoñ ke aage
āsān ḳhudā kar de ye dushvār mohabbat

ham dekhte haiñ tum meñ ḳhudā jaane buto kyā
is bhed ko allāh kī qasam kah nahīñ sakte

ḳhudā bhī kaisā huā ḳhush mire qarīne par
mujhe shahīd kā darja milā hai jiine par

yuuñ ḳhush haiñ jaise vāqi.atan ho ga.e ḳhudā
majbūriyoñ ke zer-e-asar kah diyā gayā

dil meñ josh-e-hadīs-e-kufr 'zahīr'
lab pe shor-e-ḳhudā-ḳhudā kab tak

hai safīne kā mere muhāfiz ḳhudā nā-ḳhudā bhī madad-gār hai ab mirā
ye bhī maanā ki hai ab muāfiq havā dil hī jab Duub jaa.e to maiñ kyā karūñ