Tags-Khuda

maiñ shukr us kā na kaise adā karūñ jānāñ
shu.ūr mujh ko mohabbat kā jis ḳhudā ne diyā

nā-ḳhudā chhoḌ ga.e biich bhañvar meñ to 'zafar'
ek tinke ke sahāre ne kahā bismillāh

āñkheñ ḳhudā ne dī haiñ to dekheñge husn-e-yār
kab tak naqāb ruḳh se uThā.ī na jā.egī

ḳhudā kare ki nazar kāmyāb ho jaa.e
tirī nazar meñ mirā intiḳhāb ho jaa.e

ye ahd-e-ishq tire mere darmiyāñ hī rahe
ḳhudā ke vāste is meñ ḳhudā kā naam na lo

safīna bahr-e-musībat se paar kar degā
ḳhudā samajhte ho jis ko vo nāḳhudā bhī hai

samajh ke zulm karo ai buto ḳhudā bhī hai
tumhāre jaur-o-jafā kī kuchh intihā bhī hai

TaTolo parakh lo chalo aazmā lo
ḳhudā kī qasam bā-ḳhudā aadmī huuñ

aaj mujh se baat agar karte nahīñ
deñge ye but kal ḳhudā ko kyā javāb

zālim ḳhudā se Dar kahīñ bijlī na gir paḌe
mushkil bahut hai girnā agar āsmān kā

aisā bhī kyā mizāj qayāmat kā din hai aaj
pesh-e-ḳhudā tum aur bhī bebāk ho ga.e

mujh ko to kaam kuchh na thā go ki vo the parī-laqā
bār-e-ḳhudā ye kyā huā kyuuñ vo mujhe satā ga.e

muhīt-e-rahmat hai josh-afzā huī hai abr-e-saḳhā kī aamad
ḳhudā kī har chiiz kah rahī hai ki ab hai nūr-e-ḳhudā kī aamad

ḳhūn-e-ushshāq karte kyuuñ nāhaq
gar butoñ ko ḳhudā kā Dar hotā

fareb-e-husn se gabr-o-musalmāñ kā chalan bigḌā
ḳhudā kī yaad bhūlā shaiḳh but se barhaman bigḌā

badlā tire sitam kā koī tujh se kyā kare
apnā hī tū farefta hove ḳhudā kare

vagarna tañg na thī ishq par ḳhudā kī zamīñ
kahā thā us ne to maiñ apne ghar chalā bhī gayā

panah mil na paa.ī ḳhayāl-e-ḳhudā meñ jamāl-e-ḳhudī meñ
maiñ is bebasī meñ pareshān su-e-najaf dekhtā huuñ

vo to hai nā-āshnā mash.hūr aalam meñ 'zafar'
par ḳhudā jaane vo tujh se āshnā kyūñkar huā

parde se dil ke baat jo kartā hai mujhe se ab
aatā hai ye ḳhayāl kahīñ ḳhud ḳhudā na ho