Tags-Khuda

jihād-e-ishq meñ ham āshiqoñ ko vaar denā
ye qurbānī ḳhudā taufīq de sau baar denā

chhūT jā.ūñ vus.atoñ kī qaid se
vahshatoñ ko lā-makānī de ḳhudā

kab talak be-mo.jaza ho kar jiyūñ
koī to apnī nishānī de ḳhudā

be-samā.at kar de saare shahr ko
yā mujhe phir be-zabānī de ḳhudā

ḳhushk dariyāoñ ko paanī de ḳhudā
bādbānoñ ko ravānī de ḳhudā

saikaḌoñ ham-zād haiñ mere yahāñ
mujh ko lekin merā saanī de ḳhudā

chāhtā huuñ ki kabhī mujh ko bhī bistar ho nasīb
jaane kis roz ḳhudā mujh ko badan baḳhshegā

bāhar galī meñ bhārī fauj-e-ḳhudā paḌī thī
ham kāfir-e-mohabbat nā-chār chhat se nikle

itnī māyūsiyāñ bhī kyā 'beḳhud'
kyā ḳhudā kā bhī aasrā na rahā

guzar gayā vo talabgāriyoñ kā daur ba-ḳhair
ḳhudā kā shukr hai kab fursat-talab bhī nahīñ

hai usī se ruuh meñ tāzgī yahī qalb-o-jāñ kī hai raushnī
tū ḳhudā-rā tark-e-sitam na kar mirī zindagī kā savāl hai

tujhe jān-e-mehr-o-vafā kaheñ tujhe aks-e-shān-e-ḳhudā kaheñ
tujhe kyā se kyā hai banā diyā ye mirī nazar kā kamāl hai

ab bhī kuchh dil meñ ra.ūnat kī jhalak baaqī hai
yā-ḳhudā phir kisī bad-ḳhū se mohabbat ho jaa.e

zamīr-e-ḳhāk shah-e-do-sarā meñ raushan hai
mirā ḳhudā mire harf-e-duā meñ raushan hai

ai ḳhudā tū ne banā.ī thiiñ vo kyā
jis kī āñkhoñ se hue sarshār sab

mai-kade ko chhoḌ ka.abe jā 'riyāz'
ġhaflat ai mard-e-ḳhudā achchhī nahīñ

ek kāfir mujh se ye kahtā gayā
rāt-din yād-e-ḳhudā achchhī nahīñ

'alī' bahr-e-mohabbat kā shanāvar huuñ ḳhudā shāhid
vafā ke naam pe ilzām ho jaane se Dartā huuñ

muqīm-e-dil hai Dañvāñ Dol rah ke ab īmāñ
butoñ ke qahr se chhūTā ḳhudā ke ghar aayā

hazār shukr ḳhudā kā yahī ġhanīmat hai
na ḳhair aayā mire dil ko aur shar aayā