Tags-Khuda

ab to insān kī azmat bhī koī chiiz nahīñ
log patthar ko ḳhudā maan liyā karte the

haañ maiñ to liye phirtā huuñ ik sajda-e-betāb
un se bhī to pūchho vo ḳhudā haiñ ki nahīñ haiñ

ḳhudā-rā aa ke mirī lo ḳhabar kahāñ ho tum
mire habīb mire chāra-gar kahāñ ho tum

āvāz de rahā hai akelā ḳhudā mujhe
maiñ us ko sun rahā huuñ havāoñ ke kaan se

jo nigah hai chashm-e-siyāh meñ vahī barq-e-tūr hai raah meñ
tirī aañkh par jo fidā hue vo shahīd-e-rāh-e-ḳhudā hue

raushnī bhī nahīñ havā bhī nahīñ
maañ kā nemul-badal ḳhudā bhī nahīñ

shaguft hotā huā aa.ina hai dil merā
mire ḳhudā abhī mahfūz huuñ riyā se maiñ

rujūa karte hue apne mudda.ā se maiñ
tire alāva bhī kuchh maañg luuñ ḳhudā se maiñ

banda-navāziyoñ pe na itrā.iye bahut
banda-navāz aap se baḌh kar ḳhudā bhī hai

kahā kis ne sitam ke din kabhī daa.im nahīñ rahte
ḳhudā ko mānñe vaalā vo shā.ir jo mire andar nihāñ hai pūchhtā hai

ḳhudā tum ko vazīr-e-bijlī-o-pānī banā de
to phir tum sārafīn-e-bijlī-o-pānī se bachnā

ḳhudā ke ghar meñ visa-card kā system nahīñ hai
credit-card ke bakre kī qurbānī se bachnā

añdhere DhūñDne nikle khañDar kyuuñ
ḳhudā jaane hue ye dar-ba-dar kyuuñ

ḳhudā kī ḳhaas ne.amat hai sukūn-e-jān-o-dil 'tāriq'
pareshānī meñ daulat kī farāvānī se kyā hogā

ḳhudā kahūñgā tumheñ nāḳhudā kahūñgā tumheñ
pukārnā hī paḌegā to kyā kahūñgā tumheñ

ḳhudā ne kyuuñ dil-e-dard-āshnā diyā hai mujhe
is āgahī ne to pāgal banā diyā hai mujhe

kyuuñ har taraf tū ḳhvār huā ehtisāb kar
nārāz kyuuñ hai tujh se ḳhudā ehtisāb kar

rahe dil pe ai zamāne tirā zor-o-jabr kab tak
kyā faqat tirā ḳhudā thā kyā mirā ḳhudā nahīñ thā

ham ne dekhā 'jijīvishā' aksar
nā-ḳhudā kashtiyāñ Dubāte haiñ

ba-ḳhudā ishq kā āzār burā hotā hai
rog chāhat kā burā pyaar burā hotā hai