Tags-Khuda

vo aa.e ghar meñ hamāre ḳhudā kī qudrat hai
kabhī ham un ko kabhī apne ghar ko dekhte haiñ

kis jurm-e-ārzū kī sazā hai ye zindagī
aisā to ai ḳhudā maiñ gunahgār bhī nahīñ

phir koī mauj-e-balā kaise mirā sar le ga.ī
ai ḳhudā mere ḳhudā tū bhī nigahbānoñ meñ thā

jaan be-maut ḳhudā bhī nahīñ letā lekin
tū ne be-maut hī logoñ ko sitamgar maarā

abhī vo saath hai mere so mujh par
ḳhudā kī mehrbānī chal rahī hai

kuchh khaTaktā to hai pahlū meñ mire rah rah kar
ab ḳhudā jaane tirī yaad hai yā dil merā

bandoñ ne jab se kaam sambhālā hai dahr kā
nāzil hai roz qahr ḳhudā ke baġhair bhī

kahūñ kyā ḳhudā jāntā hai sanam
mohabbat tirī apnā īmān hai

tāqat pe pahle apnī to raazī ḳhudā karo
phir bāzūoñ meñ tum dar-e-ḳhaibar sameT lo

burī hai ai 'dāġh' rāh-e-ulfat ḳhudā na le jaa.e aise raste
jo apnī tum ḳhair chāhte ho to bhuul kar dil-lagī na karnā

madār hai nāseho tumhīñ par tamām ab us kī munsifī kā
zarā to kahnā ḳhudā-lagī bhī faqat suḳhan-parvarī na karnā

na chhoḌūñgā kabhī maiñ but-parastī
na ho go mujh se ai 'tābāñ' ḳhudā ḳhush

sanam ke paas se qāsid phirā hai
ḳhudā jaane ki maiñ nā-ḳhush huuñ yā ḳhush

na to kufr ke na ḳhudā ke ham na davā ke ham na duā ke ham
ki butān-e-ka.aba-e-ārzū dil-e-barhaman se chale ga.e

mohabbatoñ meñ ye īmāñ ye chashm-e-nam ye taḌap
butoñ se ham ko bahut kuchh milā ḳhudā kī qasam

sochī thī jo vo jurm-o-sazā tak pahuñch ga.ī
jo baat dil meñ thī vo ḳhudā tak pahuñch ga.ī

pahle to dil meñ ḳhudā jaane kidhar se aa chhupe
phir sitam ye hai ubhārā mere mahsūsāt ko

vaa.iz piye hue huuñ ḳhudā ke liye na chheḌ
dhaḌkā miTā huā hai azaab o savāb kā

abhī abhī jo mujhe tujh pe pyaar aa rahā hai
ḳhudā kā shukr adā kar tū rū-ba-rū nahīñ hai

ḳhudā hī pahuñche fariyādoñ ko ham se be-nasīboñ ke
hamāre dil kabāb aur tū piye pyāle raqīboñ ke