Tags-Khuda

mirī ġhairat-e-hama-gīr ne mujhe tere dar se uThā diyā
kuchh anā kā zor jo kam huā to ḳhabar huī tū ḳhudā sā hai

ga.e jī se chhūTe butoñ kī jafā se
yahī baat ham chāhte the ḳhudā se

'ehsās' ne butoñ meñ ḳhudā ko kiyā sharīk
is shirk ke baġhair to īmān hī nahīñ

jo zikr aatā hai āḳhirat kā to aap hote haiñ saaf munkir
ḳhudā kī nisbat bhī dekhtā huuñ yaqīn ruḳhsat gumān baaqī

'ābrū' ġham ke bhañvar meñ dil ḳhudā setī lagā
nāḳhudā kuchh kaam aatā nahiñ hai mañjdhāroñ ke biich

is pe la.anat ho ḳhudā kī ye hai shaitānoñ kī raah
saiñkaḌoñ mardoñ ko kar detī hai ik pal meñ tabāh

'mohsin' sunā hai ham ne ye kāmil faqīr se
hogā ḳhudā se āshnā jo ḳhud-shanās hai

ḳhudā hī jaane 'yagānā' maiñ kaun huuñ kyā huuñ
ḳhud apnī zaat pe shak dil meñ aa.e haiñ kyā kyā

tujh se ḳhudā hī samjhe tū ne kisī ko ai dil
mujh se bhī kuchh ziyāda dīvāna kar diyā hai

āvāz de rahā hai akelā ḳhudā mujhe
maiñ us ko sun rahā huuñ havāoñ ke kaan se

kabhī ḳhud ko chhū kar nahīñ dekhtā huuñ
ḳhudā jaane kis vahm meñ mubtalā huuñ

khiḌkī se us sanam kā jo mukhḌā nazar paḌā
tāq-e-haram se jalva ḳhudā kā nazar paḌā

na ye taqdīr kā likhā thā na manshā-e-ḳhudā
hādse mujh pe jo guzre mire hālāt meñ the

phir se ḳhudā banā.egā koī nayā jahāñ
duniyā ko yuuñ miTā.egī ikkīsvīñ sadī

un ko 'gulzār' maiñ ḳhudā samjhā
mujh ko mere ḳhudā ne luuT liyā

ik but-e-bevafā ne luuT liyā
mujh ko tere ḳhudā ne luuT liyā

is ahd meñ kyā rakkhā thā jis pe basar hotī
kyā hotā jo virse meñ miltā na ḳhudā mujh ko

aaj kā din to bahut ḳhair se guzrā 'nāsik'
kal kī kyuuñ fikr karūñ kal kā ḳhudā zāmin hai

butoñ ke dil meñ yuuñ shāyad ḳhudā kā ḳhauf paidā ho
ye mere dil ke TukḌe jā ke but-ḳhāne meñ rakh denā

tū ḳhudā hai na mirā ishq farishtoñ jaisā
donoñ insāñ haiñ to kyuuñ itne hijāboñ meñ mileñ