Tags-Khuda

aap jo kuchh kaheñ hameñ manzūr
nek bande ḳhudā se Darte haiñ

ḳhudā jaane ki duniyā meñ mileñ us se ki uqbā meñ
makāñ to 'mīr'-sāhib shohra-e-ālam haiñ ye donoñ

achchhe bashar haiñ jin ko nahīñ DhūñDne kī dhun
achchhā ḳhudā hai duur hai vābastgān se

ḳhudā ke āshiq to haiñ hazāroñ banoñ meñ phirte haiñ maare maare
maiñ us kā banda banūñgā jis ko ḳhudā ke bandoñ se pyaar hogā

dayār maġhrib ke rahne vaalo ḳhudā kī bastī dukāñ nahīñ hai
kharā hai jise tum samajh rahe ho vo ab zar kam-ayār hogā

tāsīr de duā meñ ḳhudā hai yahī duā
ūñche jo donoñ haath hamāre hue to kyā

had ho ga.ī thī ham se mohabbat meñ kufr kī
jaise ḳhudā-na-ḳhvāsta vo lā-sharīk thā

maġhrūr na rah hasti-e-mauhūm pe ġhāfil
yaañ aañkh jhapakte hī ḳhudā jāniye kyā ho

paḌ gayā hai ḳhudā se kaam mujhe
aur ḳhudā kā koī pata hī nahīñ

ḳhudā maane hue ho ek but ko
karoge ab usī kī bandagī kyā

ab to sūrat apnī dikhlāo ḳhudā ke vāste
dam nikaltā hai tumhāre tālib-e-dīdār kā

ḳhudā jaane ḳhudā ne kyuuñ mujhe itnā navāzā hai
maiñ jab bhī laḌkhaḌātā huuñ sahāre gher lete haiñ

fanā ne kuchh nahīñ māñgā savāl karte hue
isī adā pe ḳhudā se davām us ne liyā

aadmī taash ke patte haiñ tire hāthoñ meñ
ai ḳhudā tū bhī to hai shobada-gar kī sūrat

huā huuñ marg ke nazdīk ġham se
ḳhudā jaane ye kis din duur hogā

'rāhī' jise ḳhudā bhī na samjhā sakā kabhī
baiThe-biThā.e dekh lo ab maan se ga.e

gavāhī kaise TūTtī muāmla ḳhudā kā thā
mirā aur us kā rābta to haath aur duā kā thā

ḳhudā ko itnā chāhūñ to ḳhudā ho jā.egā raazī
magar vo aur bhī maġhrūr ho jaa.e to kyā kiije

ḳhudā jaane ye duniyā jalva-gāh-e-nāz hai kis kī
hazāroñ uTh ga.e lekin vahī raunaq hai majlis kī

kyūñkar uThtā hai ḳhudā rañj-e-qafas
mar ga.e ham to kaf-e-saiyād meñ