Tags-Khuda

magar phir zindagī bhar bandagī duniyā kī hai varna
kise achchhā nahīñ lagtā hai thoḌā sā ḳhudā honā

ho-na-ho is meñ koī raaz chhupā hai 'aḳhtar'
kaam aksar to ḳhudā kā bhī bashar se niklā

mujhe ik hayāt dobāra de usī qudrat apnī se ai ḳhudā
ki ḳhitāb-e-fiqra-e-kam-libast kiyā thā jin ne uzair se

nahīñ hote aam ke rū-ba-rū hameñ qibla ḳhaas hai aarzū
ki ḳhudā kare paḌe guftugū kisī pīr-o-murshid-e-dair se

ḳhudā kare ki use ilm bhī na ho 'mohsin'
vo jis ke gird mirī chāhatoñ kā haalā hai

ḳhudā kare tujhe duurī hī raas aa jaa.e
tū kyā karegā bhalā ab yahāñ par aa kar bhī

'nazīr' vo but hai dushman-e-jāñ na miliyo us se tū dekh hargiz
vagar milā to ḳhudā hai hāfiz bache haiñ ham bhī ḳhudā ḳhudā kar

samajh hai gayā maiñ kahūñgā na kuchh ḳhudā kī qasam
sharāb aap mujhe kyuuñ pilā.e jaate haiñ

jis ko kisī aazar ne hai patthar se tarāshā
ab shūmī-e-taqdīr se vo merā ḳhudā hai

ḳhudā us ko sadā pur-nūr rakkhe
maiñ taarā jis nazar kā ho gayā huuñ

jo nahīñ jāntā huuñ ḳhalq-e-ḳhudā pūchhtī hai
mujh se har moḌ pe ab merā patā pūchhtī hai

kabhī vo TuuT ke bikhrā kabhī vo jam.a huā
ḳhudā ne us ko ajab mo.ajiza-numā.ī dī

shahpar-e-ilm kī jholī kamāl se ḳhālī
ḳhudā ke vāste koī ḳhitāb de jaao

na ho munkir na ho munkir ḳhudā vo hai ḳhudā vo hai
rujūa qalb ho jaate hai jis kī samt mushkil meñ

yahī duā hai vo merī duā nahīñ suntā
ḳhudā jo hotā agar kyā ḳhudā nahīñ suntā

bichhaḌ ga.e haiñ kahāñ ham-safar ḳhudā jaane
nuqūsh-e-pā bhī nahīñ gard-e-kārvāñ bhī nahīñ

zindagī apnī jab is shakl se guzrī 'ġhālib'
ham bhī kyā yaad kareñge ki ḳhudā rakhte the

ġham ke hāthoñ shukr-e-ḳhudā hai ishq kā charchā aam nahīñ
galī galī patthar paḌte hoñ ham aise badnām nahīñ

koī ḳhudā ho ki patthar jise bhī ham chāheñ
tamām umr usī kī ibādateñ karnī

vo kār-gah na rahī aur na vo sifāl rahī
ḳhudā ke daur meñ kyā aadmī nikalte the