Tags-Khuda

hameñ nit asīr-e-balā chāhtā hai
hamārī ḳhushī kab ḳhudā chāhtā hai

aur kahtī hai jhāñk kar dil meñ
terā maz.hab, tirā aziim ḳhudā

surme kā til banā ke ruḳh-e-lā-javāb meñ
nuqta baḌhā rahe ho ḳhudā kī kitāb meñ

naav TuuTī to saare parda-nashīñ
sāmne nā-ḳhudā ke baiTh ga.e

'mā.il' īmān hai bil-ġhaib hameñ logoñ kā
ki payambar ko hai dekhā na ḳhudā ko dekhā

mujhe kāfir hī batānā hai ye vaa.iz kam-baḳht
maiñ ne bandoñ meñ ka.ī baar ḳhudā ko dekhā

tujh ko dekhā na tire nāz-o-adā ko dekhā
terī har tarz meñ ik shān-e-ḳhudā ko dekhā

kisī kī āñkhoñ kā zikr chheḌeñ ajiib kuchh pur-vaqār āñkheñ
magar ḳhudā vāsta na Daale baḌī hī be-e'tibār āñkheñ

qudrat ḳhudā ke dekho ki chorī to ham kareñ
aur ulTe dast-gīr ho duzd-e-hinā bañdhe

sar-phire karne lage haiñ jazb soz-e-dil kī baat
ab ḳhudā rakkhe to rakkhe aap kī mahfil kī baat

'āsī' ḳhudā kā shukr karo jis ke lutf ne
auroñ ke saath tum ko bhī insāñ banā diyā

aaj pī lene de jī lene de mujh ko saaqī
kal mirī raat ḳhudā jaane kahāñ guzregī

ḳhudā to mālik-o-muḳhtār hai kahīñ bhī rahe
kabhī bashar meñ kabhī jānvar meñ rahtā hai

jo log maut ko zālim qarār dete haiñ
ḳhudā milā.e unheñ zindagī ke māroñ se

ishq hai maiñ huuñ dil-e-nākām hai
is ke aage bas ḳhudā kā naam hai

na.ī zamīnoñ ko arz-e-gumāñ banāte haiñ
ḳhudā ke ba.ad koī sā.ebāñ banāte haiñ

zarā muḌ kar dekho
tum apne ḳhudā ko kahāñ chhoḌ aa.ī ho

ḳhudā jāniye dil pe kyā guzre āḳhir
ye ahl-e-vafā hai sitamgār tum ho

kahīñ aisā na ho ham chhoḌ deñ insān kā qālib
na denā ai ḳhudā vo rizq jo haivān lete haiñ

ḳhudā hāfiz hai apnā dekhiye kaisī guzartī hai
baḌī mushkil hai rāh-e-ishq kā dushvār ho jaanā