Tags-Khuda

apne liye ab ek hī raah najāt hai
har zulm ko razā-e-ḳhudā kah liyā karo

tumhārī sub.h meñ ek rañg hai nadāmat kā
mujhe bhī raat se ḳhauf-e-ḳhudā ziyāda hai

jo maiñ na hotā sar-e-dār dūsrā hotā
kisī ko ḳhalq-e-ḳhudā kī zabāñ to honā thā

vo chāhtā to mujhe sañg-dil banā detā
zyādtī mire dil par mire ḳhudā ne kī

kashtī-o-nā-ḳhudā bahut ḳhatre
ka.ī tūfāñ ka.ī bhañvar mujh meñ

ḳhudā-lagtī kaho but-ḳhāne vaalo
tumhāre saath meñ kaisā rahā huuñ

butoñ ko qaul detā huuñ vafā kā
qasam apne ḳhudā kī khā rahā huuñ

maiñ kufr o diiñ se guzar kar huā huuñ lā-maz.hab
ḳhudā-parast se matlab na but-parast se kaam

ka.ī be-rañg se ḳhāke ka.ī sad-rañg tasvīreñ
ḳhudā ma.alūm kin tārīkiyoñ se khīñch laatā hai

maiñ kahtā huuñ ḳhudā ke vāste ḳhāmosh ho jaao
satāne meñ kisī majbūr ko kyā lutf aatā hai

chaḌhī haiñ tevriyāñ kuchh hai mizha bhī jumbish meñ
ḳhudā hī jaane ye teġh-e-adā kidhar ko chale

uThā ke naaz se dāman bhalā kidhar ko chale
idhar to dekhiye bahr-e-ḳhudā kidhar ko chale

vo darmiyān se niklā to ye khulā mujh par
ki ho ga.e haiñ musallat ka.ī ḳhudā mujh par

tirā husn asiir na kar sakā na maiñ tere vāste mar sakā
kahīñ merā saath mire ḳhudā ne diyā na ho kahīñ yuuñ na ho

ham us pe marte haiñ muddat se aur vo kahtā hai
qasam ḳhudā kī hameñ to ye ab huā ma.alūm

na us ke naam se vāqif na us kī jā ma.alūm
milegā dekhiye kyūñkar vo but ḳhudā ma.alūm

ghar ko chhoḌā hai ḳhudā jaane kahāñ jaane ko
ab samajh lījiye TuuTā huā taarā mujh ko

allāh-re josh-e-ishq ki uThtī jidhar nazar
tum ko hī bas ḳhudā kī qasam dekhte rahe

ai ḳhalish bol kyā yahī hai ḳhudā
ye jo dil meñ ḳhalā sā rahtā hai

chuum kar jis ko ḳhudā ke haath sauñpā thā 'nasīm'
us ke baare meñ hamesha sochnā achchhā nahīñ