Tags-Khuda

ḳhudā ne baḳhshā hai kyā zarf mom-battī ko
pighalte rahnā magar saarī raat chup rahnā

nā-ḳhudā be-ḳhauf ab lañgar uThā
naav meñ ik bā-ḳhudā maujūd hai

be-niyāzī bhī vahī aur ta.alluq bhī vahī
tumheñ aatā hai mohabbat meñ ḳhudā ho jaanā

mar chale ab to us sanam se mileñ
'momin' andesha-e-ḳhudā kab tak

maiñ terā naam salīqe se to pukārūñ magar
ḳhudā-na-ḳhvāsta luknat zabāñ meñ aa jaa.e

falsafī ko bahs ke andar ḳhudā miltā nahīñ
Dor ko suljhā rahā hai aur sirā miltā nahīñ

armāñ jo ham ne jam.a kiye the shabāb meñ
piirī meñ vo ḳhudā ko ḳhabar hai kidhar ga.e

jo zamāne se chhupānī thī mujhe har vo baat
sher-dar-sher bayāñ hai ki ḳhudā ḳhair kare

mujh meñ ik dasht sā qaa.em hai magar chāroñ taraf
shahr kā shahr ravāñ hai ki ḳhudā ḳhair kare

ik ḳhudā hai jo mahz guftugū meñ hai maujūd
aur usī se ye gumāñ hai ki ḳhudā ḳhair kare

haa.e vo yaad kahāñ hai ki ḳhudā ḳhair kare
dil meñ phir amn-o-amāñ hai ki ḳhudā ḳhair kare

ḳhudā ne muñh meñ zabān dī hai to shukr ye hai ki muñh se bolo
ki kuchh dinoñ meñ na muñh rahegā na muñh meñ chaltī zabāñ rahegī

kudūrat mā-sivā kī dho le ḳhātir-ḳhvāh ḳhātir se
ba-juz nām-e-ḳhudā hamrāh mat nām-o-nishāñ le jā

mil ke shaitāñ se likhā lī ye zamīñ naam apne
phir ise mulk-e-ḳhudā-dād kiyā hai maiñ ne

jo ḳhudā hai kabhī to soche vo
ek duniyā na.ī banā.īñ kyā

'rasā' ko sab ne samjhāyā magar samjhā na kuchh zālim
hue majbūr us mard-e-ḳhudā ke jānñe vaale

maiñ tumhāre sāmne is vāste ḳhāmosh huuñ
faisla ho jā.egā ik din ḳhudā ke sāmne

'inshā' ḳhudā ke fazl pe rakhiye nigāh aur
din hañs ke kaaT Dāliye himmat na hāriye

kareñ sajda faqat ham bahr-sajda
nahīñ manzūr banda kyā ḳhudā kyā

but-e-kāfir se ulfat hai 'sahar' ko
vahī jaane ki but kyā hai ḳhudā kyā