Tags-Khuda

kal to ḳhair ai rahbar tere saath rahrav the
aaj kis pe hañstī hai gumrahī ḳhudā-ma.alūm

sirf bhiik māñgī thī ham ne ādamiyat kī
kyuuñ biphar ga.e 'yāqūb' mudda.ī ḳhudā-ma.alūm

chāhtī hai āḳhir kyā āgahī ḳhudā-ma.alūm
kitne rañg badlegī zindagī ḳhudā-ma.alūm

zauq-e-naġhma-e-pairā.ī tū hī baḌh ke de āvāz
kab se ġharq-e-hairat hai ḳhāmushī ḳhudā-ma.alūm

ab to vaqt aayā hai Duub kar ubharne kā
kitnī kashtiyāñ Dūbīñ aur abhī ḳhudā-ma.alūm

terī duniyā meñ tire husn kā shaidā.ī huuñ
ai ḳhudā mujh ko gunahgār na samjhā jaa.e

tere bhītar kā ḳhudā jaag uThe
itnī shiddat se ibādat karnā

ham jise ishq meñ dete haiñ ḳhudā kā mansab
pahle pahle hameñ logoñ kī tarah hotā hai

ye husn ye shabāb ye ma.asūmī-e-jamāl
tum daad lo ḳhudā kī qasam jā ke huur se

ye ghar mirā gulshan hai gulshan kā ḳhudā hāfiz
allāh nigahbān nasheman kā ḳhudā hāfiz

mirā haath dekh barahmana mirā yaar mujh ko milegā kab
tire muñh se nikle ḳhudā kare is saal meñ isī maah meñ

havā ke zor se hī kashtiyāñ nahīñ chaltīñ
ki nāḳhudā bhī ḳhudā se zarā guhār kare

chalī hai chhoḌ kar tū kyuuñ bahār-e-gulistāñ mujh ko
ḳhudā jaane kahāñ le jaa.e ab bād-e-ḳhizāñ mujh ko

ḳhudā aliim hai har shaḳhs kī banāvaT kā
kaho namāziyo sajde kiye ki sar paTkā

ahl-e-zāhir jis qadar chāheñ kareñ bahs-o-jidāl
maiñ ye samjhā huuñ ḳhudī meñ to ḳhudā miltā nahīñ

kashti-e-dil kī ilāhī bahr-e-hastī meñ ho ḳhair
nāḳhudā milte haiñ lekin bā-ḳhudā miltā nahīñ

falsafī ko bahs ke andar ḳhudā miltā nahīñ
Dor ko suljhā rahā hai aur sirā miltā nahīñ

ḳhudā kā shukr ki sab ḳhairiyat se hai ya.anī
mire vajūd meñ halchal hai aaj bhī yaaro