Tags-Khuda

mil nahīñ saktā ḳhudā hai is ḳhudī ke saath meñ
ai dil is qaid-e-ḳhudī se jald-tar ab chhūT chhūT

ehsān nā-ḳhudā kā uThā.e mirī balā
kashtī ḳhudā pe chhoḌ duuñ lañgar ko toḌ duuñ

vaa.iz ik aib se tū paak hai yā zāt-e-ḳhudā
varna be-aib zamāne meñ chalan kis kā hai

kuchh mirā hī nahīñ vo but ma.abūd
ba-ḳhudā hai ḳhudā ḳhudā.ī kā

sub.h hote hī ḳhudā jaane chalā jaa.e kidhar
rāt-bhar shāḳh pe is ġham meñ gul-e-tar jaagā

uThā ḳhud jis se jaatā bhī nahīñ hai
ḳhudā us ko uThātā bhī nahīñ hai

na to ilm apne meñ hai yahāñ ki ḳhudā ne bhejā hai kis liye
isī ko jo kahte haiñ zindagī so to jism ke hai azaab meñ

qasam ḳhudā kī ye girya na dekh pā.ūñgā
ḳhushī se jā.iye rishta tamām karte hue

ḳhudā kī tarh shāyad qaid haiñ apnī sadāqat meñ
ab apne gird afsānoñ ke pahre kar liye ham ne

hamesha mā.il-e-husn-e-butāñ rahe 'āzar'
kabhī to qā.il-e-husn-e-ḳhudā hue hote

ghar ḳhudā kā thā magar but is meñ aa kar bas ga.e
ab muraqqa.a hai hasīnoñ kā hamārā dil nahīñ

hameñ to raas na aa.ī kisī kī mahfil bhī
koī ḳhudā koī ham-sāya-e-ḳhudā niklā

koī makīñ bhī na thā us makāñ se lauTā huuñ
ḳhudā hī jāntā hai maiñ kahāñ se lauTā huuñ

ye haqīqat hai ki tujh se hai mirā honā magar
bandagī merī hai so tū bhī ḳhudā mujh se hai

ḳhudā kā shukr terī zulf bikhrī
baḌī garmī kā hañgām aa rahā thā

vo shaḳhs merī rasā.ī se māvarā bhī na thā
bashar bhī ḳhair na hogā magar ḳhudā bhī na thā

apnī hī vaz.a pe lāveñge ḳhudā ḳhair kare
be-tarah rahte haiñ is shoḳh se ayyār mile

ḳhudā ke Dar se ham tum ko ḳhudā to kah nahīñ sakte
magar lutf-e-ḳhudā qahr-e-ḳhudā shān-e-ḳhudā tum ho

do din bhī us sanam se na apnī nibhī kabhī
jab kuchh banī to fazl-e-ḳhudā se bigaḌ ga.ī

ḳhudā us se nipTe to nipTe ki ye dil
hamārā nahīñ hai tumhārā nahīñ hai