Tags-Khuda

rind phailā.e haiñ chullū ko takalluf kaisā
sāqiyā Dhaal bhī de jaam ḳhudā-sāz aayā

tire naqsh-e-qadam par sar jhukānā kaam hai apnā
ḳhudā shāhid ye merī bandagī hai aur bas maiñ huuñ

vo butoñ ne Daale haiñ vasvase ki diloñ se ḳhauf-e-ḳhudā gayā
vo paḌī haiñ roz qayāmateñ ki ḳhayāl-e-roz-e-jazā gayā

qayāmat meñ vo mujh ko dekh kar kahte haiñ ġhairoñ se
ḳhudā kī shaan hai āshiq chale haiñ dād-ḳhvāhī ko

mujh ko sādāt kī nisbat ke sabab mere ḳhudā
ājizī denā takabbur kī adā mat denā

is ke alāva koī hamārā nahīñ yahāñ
jaao koī ḳhudā ko bulā laao dauḌ kar

adā-e-ishq huuñ puurī anā ke saath huuñ maiñ
ḳhud apne saath huuñ ya.anī ḳhudā ke saath huuñ maiñ

ḳhudā kī shāyad razā ho is meñ
tumhārā jo faisla rahā thā

usī kā īmāñ badal gayā hai
kabhī jo merā ḳhudā rahā thā

duā se kuchh na huā iltijā se kuchh na huā
butoñ ke ishq meñ yād-e-ḳhudā se kuchh na havā

ai ḳhudā jab se atā kī tū ne peshānī mujhe
sar uThāne meñ huī hai kitnī āsānī mujhe

butoñ ko de diyā nām-e-ḳhudā dil
'saḳhā' merī bhī kyā himmat hai kyā dil

jo tasavvur se māvarā na huā
vo to banda huā ḳhudā na huā

kyā bharosa hai samundar kā ḳhudā ḳhair kare
sīpiyāñ chunñe ga.e haiñ mire saare bachche

us sanam kī galī meñ jaatā huuñ
phir nazar jānib-e-ḳhudā kar ke

ham baḌe dasht-e-balā se guzre
un se guzre na ḳhudā se guzre

maiñ ne kab apnī vafāoñ kā sila māñgā thā
ik tabassum hī tirā bahr-e-ḳhudā māñgā thā

hairāñ hai jabīñ aaj kidhar sajda ravā hai
sar par haiñ ḳhudāvand sar-e-arsh ḳhudā hai

ai ḳhizr pai-e-ḳhajista bahr-e-ḳhudā karam kar
bhaTke hue musāfir manzil ko DhūñDte haiñ

zālim mire gumāñ se mujhe munfa.il na chaah
hai hai ḳhudā-na-karda tujhe bevafā kahūñ