Tags-Khuda

gar tū 'hassān' chāhe razā-e-ḳhudā
dushmanoñ ko bhī rañj-o-tabāhī na de

ma.alūm hai ḳhudā ko jo hālat diloñ kī hai
ai shaiḳh ham faqīroñ pe fatvā na chāhiye

hai mirā zauq-e-junūñ kufr-o-ḳhirad kī zad meñ
ai ḳhudā ab to uThā le mujhe īmān ke saath

kyuuñ na ho daar kā vo mustaujib
jo ki banda kahe ḳhudā huuñ maiñ

ham tum baiTheñge paas mil kar
vo din bhī kabhū ḳhudā karegā

savāl karte haiñ mujh se kyā kyā pa.e-ḳhudā mere rāhbar aa
paḌā maiñ taktā huuñ terā rasta nakīr-o-munkir khaḌe hue haiñ

ḳhudā ḳhudā kar ke aa.e bhī vo to muñh lapeTe paḌe hue haiñ
na kahte haiñ kuchh na sunte haiñ kuchh kasī se jaise laḌe hue haiñ

vahāñ jā kar kiye haiñ maiñ ne sajde apnī hastī ko
jahāñ banda pahuñch kar ḳhud ḳhudā mālūm hotā hai

zabān-e-qātil-o-maqtūl par hai ek hī naam
ḳhudā ke naam pe guzrīñ qayāmateñ kyā kyā

ba-nām-e-maz.hab-o-millat ye ḳhuuñ bahānā kyā
harī harī vo kareñ tū ḳhudā ḳhudā kiyā kar

bagūla dekh ke shukr-e-ḳhudā vo kahte haiñ
nazar meñ phir ga.ī ik ḳhāksār kī sūrat

Duubā safīna jis meñ musāfir koī na thā
lekin bhare hue the vahāñ nā-ḳhudā bahut

ḳhair honā to vahī hai jo ḳhudā chāhegā
phir bhī kar sakte haiñ ham log jo kar dekheñ to

ḳhudā mahfūz rakkhe ḳhauf-e-āseb-e-asīrī se
maiñ gulshan meñ bhī āzādī kā naġhma gā nahīñ saktā

ḳhudā kare na vo uftād aa paḌe ham par
ki jān-o-dil raheñ aur terī aarzū na rahe

ai ḳhudā ye vajūd kā jhagḌā
ḳhaak kā hai ki āsmānī hai

dikhlā.e ḳhudā us sitam-ījād kī sūrat
istāda haiñ ham baaġh meñ shamshād kī sūrat

bas us ke hone kā ehsās hai ġharaz ki ḳhudā
vajūd vāhime ke darmiyān zinda rahā

jahān-e-marg-e-sadā meñ ik aur silsila ḳhatm ho gayā hai
kalām ya.anī ḳhudā kā ham se mukālima ḳhatm ho gayā hai

hamārī sāda-lauhī thī ḳhudā-baḳhshe ki ḳhush-fahmī
ki har insān kī sūrat ko mā-fauq-ul-bashar jaanā