Tags-Ada

dekh ḳhūbāñ kuuñ vaqt milne ke
kis adā suuñ salām karte haiñ

namāzeñ bhī adā hotī rahīñ un kī magar jab bhī
milī rishvat to hākim ne chhupā kar jeb meñ rakh lī

dilkash hai gulsitāñ bhī tire husn kī tarah
lekin tirī adā kī tarah dil-sitāñ nahīñ

bulbul-e-shīrāz ne chhoḌ diyā ishq-e-gul
ġhuncha-dahan ko sunā baat meñ jab ḳhush-adā

adā fahmān-e-shauq-e-vasl ho tūr-e-tajallī par
maza dīdār kā miltā hai bāñg-e-lan-tarānī se

har ek lamha kiyā qarz zindagī kā adā
kuchh apnā haq bhī thā ham par vahī adā na huā

qayāmat se Darātī kyuuñ hai duniyā
qayāmat se hai kam un kī adā kyā

kyā adā se aave hai dīvāna kar ke sair-e-bāġh
phuul kānoñ meñ to haiñ ḳhār-e-muġhīlāñ haath meñ

qarz TuuTe hue ḳhvāboñ kā adā ho jaa.e
zaat meñ apnī bikhar jaane ko jī chāhtā hai

haiñ tire ramz-e-tabassum ke adā-fahm jo shaḳhs
jumbish-e-la.al-e-fusūñ-sāz meñ mar jaate haiñ

ishq-ābād faqīroñ kī adā rakhte haiñ
aur kyā is ke sivā ahl-e-anā rakhte haiñ

ik adā thī ki raah roktī thī
ik anā thī ki jis ne uksāyā

har adā māshūq kī bantī hai paimān-e-vafā
laġhzish-e-pā ko nazar-andāz karnā chāhiye

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

tab shab-e-vasl tirā shukr adā ho yārab
bahr-e-tasbīh mileñ dāna-e-anjum mujh ko

parda-e-āzurdagī meñ thī vo jān-e-iltifāt
jis adā ko ranjish-e-bejā samajh baiThe the ham

maiñ ne qātil kā adā rol kiyā hai 'hamdam'
kyuuñ mujhe apne hī kirdār se Dar lagtā hai

sar uThāne kā bhalā aur kise yaarā thā
bas tire shahr meñ ye rasm adā ham se huī

tirī adā meñ purkārī sī kyā shai hai
baat zarā sī aur jhijakne vaalā maiñ

kaise adā karūñ namāz kaise jhukā.ūñ apnā sar
sehn-e-haram meñ shaiḳh-jī yaar kā naqsh-e-pā nahīñ