Tags-Ada

husn har rañg meñ maḳhsūs kashish rakhtā hai
vo tabassum kī adā ho ki sitam-koshī ho

ik dil thā jo pahle hī tujhe sauñp diyā thā
ye jaan bhī ai jān-e-adā saath liye jā

lagāvaT kī adā se un kā kahnā paan hāzir hai
qayāmat hai sitam hai dil fidā hai jaan hāzir hai

mire sulūk kī qīmat yahīñ adā kar de
mujhe gunāh kī lazzat se āshnā kar de

lab khulte hī phuul haiñ jhaḌte
kitnī pyārī un kī adā hai

ajiib tarz-e-takallum hai ahl-e-mansab kā
bahut dinoñ se kisī ḳhush-adā kī hājat hai

adā hai ḳhvāb hai taskīn hai tamāshā hai
hamārī aañkh meñ ik shaḳhs be-tahāshā hai

in shoḳh hasīnoñ kī nirālī hai adā bhī
but ho ke samajhte haiñ ki jaise haiñ ḳhudā bhī

ye adā dekh ke kitnoñ kā huā kaam tamām
nīmcha kal jo Tuk us arbada-jū kā niklā

yahī atiyya-e-sub.h-e-shab-e-visāl hai kyā
ki sehr-e-nāz-o-zadā bhī nahīñ rahā ab to

tere ehsānoñ kā haq puurā adā karte haiñ
bharne lagte haiñ to zaḳhmoñ ko harā karte haiñ

adā zabān se harf-e-nahīñ ziyāda huā
isī pe qatl mirā saarā ḳhānvāda huā

marte dam tak tirī talvār kā dam bharte rahe
haq adā ho na sakā phir bhī vafādāroñ se

kuchh is adā se milā aaj mujh se vo 'shāhid'
ki mujh ko ḳhud pe kisī aur kā qayās huā

nazar ne kī nazr-e-rūh-o-dil pesh-e-lab pe shor-e-fuġhāñ se pahle
adā huā sajda-e-mohabbat ḳharosh-e-bāñg-e-azāñ se pahle

kyā kuchh luTā diyā hai tirī har adā ke saath
kyā mil gayā hameñ jo ye husn-e-bayāñ milā

dikhāte haiñ adā kuchh bhī to aafat aa hī jaatī hai
sambhal kar laakh chalte haiñ qayāmat aa hī jaatī hai

apnī hī teġh-e-adā se aap ghāyal ho gayā
chāñd ne paanī meñ dekhā aur pāgal ho gayā

sahal-tar hogā najāt-e-ḳhalq meñ qarz-e-vafā
jaan bhī degā agar 'aḳhtar' adā ho jā.egā

andāza-e-jamāl ba-qadr-e-nigāh hai
chashm-e-kalīm jalva-tarāz-e-adā nahīñ