Tags-Ada

taġhāful kī adā ho yā hukūmat kī adākārī
burā kis ko kahūñ mere liye sarkār haiñ donoñ

dhaḌkanoñ meñ kar diyā paidā fasād
har adā meñ terī ik balvā.ī hai

kabhī gale bhī milo aa ke shāḳh-e-gul kī tarah
adā to kar diye haq ham ne intizār ke bhī

us husn-e-ta.alluq kā adā shukr ho kyūñ-kar
maiñ ne jo kiyā yaad to us ne bhī kiyā yaad

ai husn ye andāz-o-adā tujh meñ kahāñ the
maiñ tere liye ā.īna-e-ishva-garī huuñ

vo kaisī aas thī adā jo kū-ba-kū liye phirī
vo kuchh to thā jo dil ko aaj tak kabhū milā nahīñ

zindagī-bhar tujhī ko chāhā hai
qarz kuchh to mirā adā kar de

naaz kā maarā huā huuñ maiñ adā kī saugand
kushta-e-jaur-o-jafā huuñ maiñ vafā kī saugand

kuchh is adā se koī dam-ba-dam lubhā.e mujhe
ki hārne bhī na de aur āzmā.e mujhe

ishvoñ kī hai na us nigah-e-fitna-zā kī hai
saarī ḳhatā mire dil-e-shorish-adā kī hai

kamī hai marne vāloñ kī na qātil kī zamāne meñ
kisī kī har adā kahtī hai qatl-e-ām hone do

kujā ye shoḳh-adā duniyā kujā maiñ 'irfān'
mard-e-sāda zan-e-bebāk se bāñdhā gayā hai

zulfoñ ko shāna kiije yā bhauñ banā ke chaliye
gar paas dil na rakhiye to ye adā nahīñ hai

gul ho mahtāb ho ā.īna ho ḳhurshīd ho miir
apnā mahbūb vahī hai jo adā rakhtā ho

is adā se dam-e-raftār qayāmat aa.ī
aise ham kyuuñ na hue un ko ye hasrat aa.ī

kaun sā lafz adā hone kā pas-manzar hai merā vajūd
kis kā haul hai mere dil meñ kaisā sannāTā huuñ maiñ

jab bhī namāz-e-fazr adā kar lete haiñ
qasam ḳhudā kī din bhar achchhā lagtā hai

zaḳhm khāte rahte haiñ muskurāte rahte haiñ
ham vafā-shanāsoñ kī ye adā purānī hai

jo ġhussa ho kar vo deve gaalī to us adā se ki ham to kyā haiñ
farishte ġhash ho ke lauT jāveñ ye lutf us ke itaab meñ hai

ye ḳhūñ-bahā bhī adā kar chukī hai ḳhvāboñ kā
to merī aañkh se ab kirchiyāñ nikālī jaa.eñ