Tags-Ada

dekhne vaale yuuñ to bahut dekhe haiñ lekin
mar jā.ūñ jo koī terī adā se dekhe

ai mere nā-gufta shero ye to batāo mere ba.ad
kaun se dil meñ qarār karoge kis ke lab se adā hoge

tark-e-vafā ke ba.ad ye us kī adā 'qatīl'
mujh ko satā.e koī to us ko burā lage

vahī aariz vahī kākul vahī kāfir-adā āñkheñ
magar har lamha phir bhī kuchh na.e jaadū nikalte haiñ

niim bismil kī kyā adā hai ye
āshiqo loTne kī jā hai ye

vo jis dam nusḳha-e-nāz-o-adā āġhāz kartā hai
to ham kahte haiñ ik ik aan par vallāh bismillāh

adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

tahrīr se varna mirī kyā ho nahīñ saktā
ik tū hai jo lafzoñ meñ adā ho nahīñ saktā

ai pyaar tire hisse meñ aayā tirī qismat
vo dard jo chehroñ se adā ho nahīñ saktā

maiñ ne chheḌā to kis adā se kahā
kuchh sunoge mirī zabān se aaj

hamd-e-bārī hai mohabbat jo usī se ho jaa.e
jis ko maḳhsūs koī apnī adā bhaa.ī hai

maanā ki jafāoñ kī talāfī haiñ vafā.eñ
hogā na 'zahīr' un kī adāoñ kā adā qarz

kal shab ajiib adā se thā ik husn mehrbāñ
vo shabnamī gulāb sī rañgat dhulī dhulī

har kisī meñ hunar nahīñ hotā
apne lahje meñ ik adā rakhnā

va.ada vo tumhārā hai ki lab tak nahīñ aatā
matlab ye hamārā hai ki bātoñ meñ adā ho

ḳhanjar kī zarūrat hai na shamshīr kī hājat
tirchhī sī nazar ho koī bāñkī sī adā ho

agar phir shahr meñ vo ḳhush-adā vāpas palaT aa.e
mulāqātoñ kā shāyad silsila vāpas palaT aa.e

lage terī balā mujhe āfat-e-jāñ kabhū phir bhī ye kah ke khilā.egā paañ
mire sar kī qasam mirī jaañ kī qasam mire ġhamza-o-nāz-o-adā kī qasam

ye shabāb-o-husn terā aur ye nāz-o-adā
TūTtī haiñ donoñ hāthoñ se tirī añgḌā.iyāñ

ḳhaak meñ mil ga.e vale aañkh uThī na sharm se
ham se huā na haq adā us kī nigāh-e-nāz kā