Tags-Ada

andāz vo nahīñ hai ab vo adā nahīñ hai
pahlā sā bāñkpan to tujh meñ rahā nahīñ hai

chhīne letī hai dil tirī tasvīr
vo adā hai ki jaan hai goyā

hai diin sar kā denā gardan pe apnī ḳhūbāñ
jiite haiñ to tumhārā ye qarz adā kareñge

har adā meñ hai hayāt-e-jāved
har ishāre meñ masīhā.ī hai

nāz-adā aur ġhamzoñ ke kuchh aur hī katregī gul-phūl
siin lagāvaT chitvan kā bhī aur hī itr nikālegī

kam-sinī meñ vo āfat-e-jāñ haiñ
jo adā hai shabāb kī sī hai

qazā se qarz kis mushkil se lī umr-e-baqā ham ne
matā-e-zindagī de kar kiyā ye qarz adā ham ne

nigah laḌā.ī hai us ne jis dam jhaTak liyā jhap to dil ko mere
adā adā ne idhar dabochā palak palak ne udhar uchhālā

chust kamar kā kyā sabab tañg qabā kī vaj.h kyā
ham to haiñ aap sar-ba-kaf ham se adā kī vaj.h kyā

na dil vāpas na dildārī ye kyā sheva hai tum ko to
na aayā qarz adā karnā na aayā farz adā karnā

maiñ shukriya adā kartā huuñ sab raqīboñ kā
yahī añdhere mujhe raushnī banāte haiñ

maiñ but-tarāsh huuñ patthar se kaam hai mujh ko
magar ye tarz-e-adā tere bāñkpan kī hai

mire ma.asūm sach ko kach.harī meñ lā khaḌā kar ke
koī dekhe ki vo kis kis adā se jhuuT bolegī

tujh bin to ham ne ve bhī bā-ḳhāmoshī adā kiiñ
yaad ā.ī.āñ jo bāteñ do-chār baiThe baiThe

nigāh-e-fitna hai ek ik adā qayāmat hai
vo laakh ban ke baḌe bholpan kī baat kareñ

itnā bhī na ghabrāo na.ī tarz-e-adā se
har daur meñ badle hue uslūb rahe haiñ

ehsān jo uThā.e haiñ auroñ ke vāste
auroñ pe haiñ vo qarz magar maiñ adā karūñ

dekh hī lete haiñ sab nāz-o-adā kī sūrat
aa.ina aap kā naqsh-e-kaf-e-pā hotā hai

un ke ġhurūr-o-ġhamza-o-nāz-o-adā kī ḳhair
raas aa chalī thī rasm-o-rah-e-āshiqī hameñ

tīrgī kī adā batātī hai
daañv par māhtāb hai koī