Tags-Ada

maiñ kis zabāñ se shukr ḳhudā kā adā karūñ
jis ne mujhe firāq kā shaidā banā diyā

qarz adā karnā hai jaañ kā to chalo maqtal meñ
khiñch ga.ī baag bajā tabl-o-alam khultā hai

namāz hogī adā duḳht-e-raz ke dāman par
hamārī bazm meñ jo aa.e bā-vazū aa.e

hai ḳhasam-jān-e-āshiq vo mahv-e-nāz lekin
har lamha be-adā.ī ye bhī to ik adā hai

har adā dil ke liye dashna-o-ḳhanjar hai magar
aur hī baat hai zālim tire sharmāne meñ

ye to ik rasm-e-jahāñ hai jo adā hotī hai
varna sūraj kī kahāñ sālgirah hotī hai

is adā se kabhī chaltī hai nasīm-e-saharī
ḳhushk pattoñ meñ bhī raftār sī aa jaatī hai

tujhe kyā batā.ūñ maiñ be-ḳhabar ki hai dard-e-ishq meñ kyā asar
ye hai vo latīf sī kaifiyat jo zabāñ tak aa.e adā na ho

ye ināyateñ ye navāzisheñ mire dard-e-dil kī davā nahīñ
mujhe us nazar kī talāsh hai jo adā-shanās-e-vafā na ho

girāñ haiñ kaan pe un ke vahī suḳhan jo abhī
adā hue bhī nahīñ nutq-e-be-navā se mire

dil meñ ik aarzū hai barsoñ se
lafz ban kar adā nahīñ hotī

harīr-o-resham-o-dībā meñ rañg-e-nāz-o-adā
sukūn-e-dil ke liye haiñ qarār-e-jāñ kī tarah

maiñ samajhtā thā tū hai apne husn se be-ḳhabar
tirī ik adā ne batā diyā tujhe ilm hai

guzashta sadiyoñ kā bhī bojh mujh ko Dhonā thā
adā huā huuñ maiñ har lamha suud kī sūrat

kuchh is adā se satā.e ga.e haiñ ham ab ke
har ek saañs meñ andāz hai duhā.ī kā

maanā ki hañsī bhī hai adā aap kī lekin
itnā kisī bekas pe hañsā bhī nahīñ karte

dayār-e-shāhid-e-bilqīs-adā se aayā huuñ
maiñ ik faqīr huuñ shahr-e-sabā se aayā huuñ

husn kī har adā kī zad pe rahe
kitnī jur.at dil-o-jigar ne kī

ye adā bhī us kī ajiib hai ki baḌhā ke hausla-e-nazar
mujhe izn-e-dīd diyā bhī hai mire dekhne pe ḳhafā bhī hai

phuul bhī muñh se jhaḌeñ baat bhī kāñTe kī rahe
ye adā aur suḳhan-sāz kahāñ rakhte haiñ