Tags-Ada

o mast-e-nāz husn tujhe kuchh ḳhabar bhī hai
tujh par nisār hote haiñ kis kis adā se ham

chalo ki jazba-e-iz.hār chīḳh meñ to Dhalā
kisī tarah ise āḳhir adā bhī honā thā

haa.e tīkhī nigah us kāfir kī
kyā kahūñ maiñ jo adā rakhtī hai

ishve se ġhamze se shoḳhī se adā se naaz se
miTne vaalā huuñ miTā diije kisī tadbīr se

ghaḌī ghaḌī hijr kī hai bahārī dikhā.e sūrat ḳhudā tumhārī
sunūñ vo bāteñ piyārī piyārī ajab adā se ajab bayāñ se

ma.asūm sitamgar kī bāteñ mazlūm adā ke afsāne
yuuñ raat basar ho jaatī hai yuuñ dil kā mudāvā karte haiñ

kāvish-e-paiham se duniyā kī fazā jannat-adā
ye tasarruf hai bashar kī quvvat-e-tasḳhīr kā

ai rūh-e-dard-o-shād ye terā hī faiz hai
'jauhar' jo is adā se ġhazal-ḳhvāñ hai āj-kal

shabīh aap kī khīñch degā ye maanā
adā kis tarah khīñche maanī tumhārī

kyā bolne meñ us but-e-kāfir kī adā hai
shīrīñ-suḳhanī ik taraf āvāz to dekho

'aḳhtar' us rañgīñ adā se raat bhar
tāla-e-bedār kī bāteñ kareñ

na tirī adā meñ vo dilkashī na mirī ġhazal meñ vo tāzgī
vo ġhubār-e-vaqt meñ dab ga.ī jo kashish thī husn-o-jamāl meñ

us ḳhush-adā ke ā.ina-ḳhāne meñ jā.ūñgā
phir lauT kar maiñ apne zamāne meñ jā.ūñgā

na nishāñ hai sāqī-o-jām kā na vo bāda-hā-e-chaman-adā
na muġhanniya rahī mahv-e-sāz na saaz mast-e-fuġhāñ rahā

na sho.ale meñ ye karishma na barq meñ ye adā
koī batāo ki vo shoḳh-e-tund-ḳhū kyā hai

ujaḌ ga.e ḳhirad-o-sabr-o-hosh-o-tāb-o-tavāñ
usī ke nāz-o-adā kī sipāh ke maare

ye sach hai peT hī ḳhālī agar ho
kisī kā ġhamza-o-nāz-o-adā kyā

miTTī kā qarz ham ne kuchh aise adā kiyā
dastār bhī utaar diyā pairahan ke saath

pāmāl kar ke pūchhte haiñ kis adā se vo
is dil meñ aag thī mire talve jhulas ga.e

nazar paḌā ik but-e-parī-vash nirālī saj-dhaj na.ī adā kā
jo umr dekho to das baras kī pe qahr o aafat ġhazab ḳhudā kā