Tags-Ada

kisī ne dīda-e-bīnā kī raushnī le lī
kahūñ maiñ kis se tirī is adā se kuchh na milā

nayā bismil huuñ maiñ vāqif nahīñ rasm-e-shahādat se
batā de tū hī ai zālim taḌapne kī adā kyā hai

ye kis ke rañg-e-ruḳh-e-bahārīñ ne baḳhsh dī hai tarāvat-e-nau
shagufta hotā na thā gulistāñ meñ us adā se gulāb pahle

bayān-e-shauq nahīñ qīl-o-qāl kā mohtāj
kabhī fuġhāñ meñ adā kar kabhī nazar se kah

ek aalam ke dil meñ baste haiñ
yaanī ik dil-nashīñ adā haiñ ham

is chashm-e-mai-farosh se pī jis kā ek umr
ik shaam kā bhī qarz ba-mushkil adā huā

nāzāñ jamāl-e-parda ġharra adā pe un ko
mujh ko bhī faḳhr lekin hai jazb-e-āshiqī par

siina toḌā dil meñ chuTkī lī jigar zaḳhmī kiyā
kyā ḳhabar thī tiir bhī terī adā ho jā.egā

sar na hogā dosh par to kyā na hogī guftugū
hichkiyoñ se shukr qātil kā adā ho jā.egā

tarjumānī kā vasīla to haiñ dar-asl ye ashk
dil ke matlab ko ham āñkhoñ se adā karte haiñ

kisī hasīna-e-bilqīs-adā kī ḳhātir ham
nigār-ḳhāna-e-shahr-e-sabā banāte haiñ

baġhaur dekh rahā hai adā-shanās mujhe
bas ab zalīl na kar ai nigāh-e-yās mujhe

jo multafit haiñ ye nazreñ badal bhī saktī haiñ
banā chukā hai zamāna adā-shanās mujhe

mabda-e-husn se kaise ye judā hai yaksar
ki zamān aur makāñ ek adā hai yaksar

maiñ dāman thāmtā huuñ aur adā dāman chhuḌātī hai
mohabbat hai to kuchh be-gāngī bhī paa.ī jaatī hai

vo jab sanjīda hote haiñ adā añgḌā.ī letī hai
vo jab ḳhāmosh hote haiñ javānī gungunātī hai

paTre dhare haiñ sar par dariyā ke paaT vaale
aate haiñ kis adā se is muñh pe ghaaT vaale

harīm-e-nāz-o-adā meñ un kī ye kaun dahqānī boltā hai
hai nā-tarāshīda guftugū se zabāñ bhī lutf-e-zabāñ bhī aajiz

sukūt añdherā tahajjud kā vaqt raat charāġh
tumhāre paañv mire hoñT adā namāz aur ishq

sāqī-garī kā farz adā kar diyā gayā
paanī kā ghūñT zahr milā kar diyā gayā