Tags-Ada

kyā ḳhabar raqs meñ ho qibla-e-jāñ
dam-ba-dam sajda adā raqs meñ ho

chaal apnī adā se chalte haiñ
ham kahāñ kaj-ravī se Talte haiñ

muñh se duā nikal hī ga.ī vaqt-e-qatl bhī
kahnā ye thā ki haqq-e-mohabbat adā huā

bane the mehmāñ āġhāz-e-ulfat meñ mire dil meñ
makīn-e-mustaqil ab ban ga.e shīrīñ-adā ho kar

tamām shahr hī terī adā se qaa.em hai
husūl-e-kār-gah-e-ġham duā se qaa.em hai

adā meñ vaañ adā niklīñ haiñ lākhoñ
maiñ samjhā be-adā.ī ho chukī bas

vo bujh ga.ī sitāra-adā aañkh kab kī dost
dil meñ kisī ke pyaar kī hasrat nahīñ rahī

kuchh aur log haiñ yahāñ is kaam ke liye
vājib hai jo bhī qarz adā mat kiyā karo

us ke ik baar dekhne kī adā
dil meñ sau hasrateñ jagātī hai

koī sauġhāt-e-vafā de ke chalā jā.ūñgā
tujh ko jiine kī adā de ke chalā jā.ūñgā

terī adā se ho na sakā jis kā faisla
vo zindagī kā raaz nishānoñ ne le liyā

vasl hai un kī adā hijr hai un kā andāz
kaun sā rañg bharūñ ishq ke afsānoñ meñ

sach hai tum ne jo lagāyā nahīñ muñh ġhunchoñ ko
unheñ phir kis ke tabassum kī adā aa.ī hai

jhuum kar aaj jo matvālī ghaTā aa.ī hai
yaad kyā kyā tirī mastāna adā aa.ī hai

vo mujhe mashvara-e-tark-e-vafā dete the
ye mohabbat kī adā hai mujhe ma.alūm na thā

naġhma-e-nai bhī na ho bāñg-e-bat-e-mai bhī na ho
ye bhī jiine kī adā hai mujhe ma.alūm na thā

zamāna furqat kā jaa.e yā-rab vo vaqt vo din bhī aa.e yā-rab
adā karūñ maiñ tirā dogānā khaḌe raheñ vo bichhā ke āñchal

ḳhudā kā shukr adā kartā huuñ maiñ sub.h-o-masā
laboñ pe rakh ke darūd-o-salām gardish meñ

tumhāre husn-o-adā ke hamīñ shikār nahīñ
na jaane kitnoñ ke dil tum ne ban-sañvar ke liye

jab adā se vo karegā qatl mujh ko ai 'asar'
kushta-e-shamshīr-e-hairat ik jahāñ ho jā.egā