Tags-Ada

jo āñkheñ chanchal kī dekheñ ham ne to nok-e-mizhgāñ ne dil ko chedā
nigah ne hosh-o-ḳhirad ko luuTā adā ne sabr-o-qarār chhīnā

ye bhī hai adā koī ḳhurshīd namat pyāre
muñh sub.h dikhā jaanā phir shaam chhupā jaanā

yā-rab hai duā merī
nekī ho adā merī

chaḌhī haiñ tevriyāñ kuchh hai mizha bhī jumbish meñ
ḳhudā hī jaane ye teġh-e-adā kidhar ko chale

tū vo kaj-adā hai jo duniyā meñ DhūñDheñ
na tujh sā mile dūsrā be-muravvat

vo aate haiñ 'shakīl' ab apne dil se haath dho baiTho
nigāh-e-nāz kī qīmat adā karne kā vaqt aayā

phir ik gum-karda-rāh-e-zindagī ko mil ga.ī manzil
sujūd-e-shukr-e-be-pāyāñ adā karne kā vaqt aayā

vo mast-e-nāz-o-adā jis ko roz va.ade ke
shikast-e-jām o shikast-e-qasam barābar hai

to bosoñ se motī se aañsū vo poñchhe
vo sau jaan se har adā par fidā hai

kaun kartā hai adā haqq-e-marāsim 'shamsī'
log bas rasm nibhāte haiñ chale jaate haiñ

vo kyā adā thī ki lahloT ho ga.e tum 'shāz'
ġhazab kiyā usī jān-e-adā se kuchh na kahā

naaz o karishma ishva-o-andāz aur adā
maiñ yak taraf huuñ itne sitamgār yak taraf

vo zulf-e-pareshāñ kā sañvāre na sañvarnā
vo un ke bigaḌne kī adā yaad rahegī

pahlī nazar meñ mujh ko to apnā banā liyā
ya.anī kuchh is adā se janāb-e-'sahar' mile

vaqt ne gard kiyā phuul se chehroñ kā jamāl
par adā baaqī hai andāz abhī baaqī hai

har ik adā meñ us kī hai qaus-e-quzah kā rañg
hai guftugū meñ kitne havāle kitāb ke

bichhaḌ ke jaise dobāra bhī aa milā huuñ use
kuchh is adā se mujhe zindagī ne dekhā hai

hai sach to ye ki mohabbat kā haq adā na huā
sitam to tark-e-mohabbat kā ik bahāna huā

dil āshiq kā kalī kī tarah khiltā jaa.e ḳhush ho ho
adā siiñ jab kabhī khole naqāb āhista āhista

adā ke tausan par us sanam ko jo aaj ham ne savār dekhā
to hilte hī Tuk inaañ ke kyā kyā kuchalte sabr-o-qarār dekhā