Tags-Ada

band kaliyoñ kī adā kahtī hai
baat karne ke haiñ sau pairā.e

lailī-e-shoḳh-adā ain-e-tasavvur jo banī
qais ko dāman-e-sahrā meñ hudā-ḳhvāñ samjhā

dekh tū yār-e-bāda-kash maiñ ne bhī kaam kyā kiyā
de ke kabāb-e-dil tujhe haqq-e-namak adā kiyā

chhup kar na rah sakegā vo ham se ki us ko ham
pahchān leñge us kī kisī ik adā se bhī

qāsid na.ī adā se adā-e-payām ho
matlab ye hai ki baat na ho aur kalām ho

rāz-e-dil laakh chhupāyā lekin
kah diyā us kī adā ne kyā kyā

adā ranjīdagī parvāngī āñsū-bharī āñkheñ
ab itnī sādgī kyā pyaar bhī karte nahīñ bantā

siine meñ haiñ ḳhalā ke vo mahfūz aaj bhī
jo harf adā hue haiñ hamārī zabān se

kaun samjhegā bhalā husn-e-gurezāñ kī adā
mere iisā ne mirā haal na pūchhā hogā

jab se us naam kā aayā hai adā kar lenā
kaun jaane ye haqīqat ki zabāñ raqs meñ hai

un se mafhūm-e-ġham-e-zīst adā ho shāyad
ashk jo dāman-e-mizhgāñ ne sambhāle hoñge

adā se us ne do bāteñ banā kar
kisī kī jaan le lī dil kisī kā

farz barsoñ kī ibādat kā adā ho jaise
but ko yuuñ puuj rahe haiñ ki ḳhudā ho jaise

hamāre mashrab meñ thī na jaa.ez dar-e-haram kī ye jubba-sā.ī
ye farz-e-nā-ḳhushgavār lekin ab un kī ḳhātir adā kareñge

mirā naam jo yaar hai pūchh rahā maiñ batā duuñ tujhe jo laqab hai mirā
mujhe kahte haiñ kushta-e-nāz-o-adā tire ġhamza-e-hosh-rubā kī qasam

mire hāthoñ meñ ḳhuun malo to zarā tumhīñ dekho to rañg dikhātā hai kyā
karo aaj numūd-e-shahīd-e-adā tumheñ shoḳhi-e-rañg-e-hinā kī qasam

kiye tum ne jo zulm vo maiñ ne sahe mirī āñkhoñ se barsoñ hī ashk bahe
koī ġhamza-o-ishva ab uTh na rahe tumheñ apne hī nāz-o-adā kī qasam

kiyā hai harf-e-haq ham ne adā kuchh is qarīne se
nazar qātil pe rakkhī thī zabāñ ḳhanjar pe rakkhī thī

bazm meñ ye adā hameñ samjhe
sab ko dekhā udhar nazar na huī

us ko har haal meñ jiine kī adā aatī thī
vo na hālāt se hotā thā pareshāñ yaaro