Tags-Ada

shoḳhī shabāb husn tabassum hayā ke saath
dil le liyā hai aap ne kis kis adā ke saath

na raas aa.egī jiine kī adā shāyad kabhī ham ko
kabhī jiinā kabhī jiine ke Dhab achchhe nahīñ lagte

in shoḳh hasīnoñ kī nirālī hai adā bhī
but ho ke samajhte haiñ ki jaise haiñ ḳhudā bhī

samajh meñ aa na sakī ye adā gulāboñ kī
chaman meñ aate haiñ siina figār karne ko

ai jaan dekhte hī mujhe duur se tum aaj
ye kaun sī adā thī ki rū-posh ho ga.e

miltā nahīñ mizāj ḳhud apnī adā meñ hai
terī galī se aa ke sabā bhī havā meñ hai

raqs-e-bismil kī mire dil ko adā bhī aa.e
mujh se bichhaḌo to taḌapne kā mazā bhī aa.e

'ġhamgīñ' jo ek aan pe tere adā huā
kyā ḳhush adā use tirī ai ḳhush-adā lagī

vahī nāz-o-adā kī shakl hogī
isī sūrat se sharmāyā kareñge

tum ne kuchh saaqī kī kal dekhī adā
mujh ko sāġhar-e-mai kā chhalkā kar diyā

'nadīm' apnī adā aisī hai jis ke sāmne aa kar
ḳhushī mad.hosh ho jaatī hai aur ġham raqs karte haiñ

husn ke haq se koī ohda-bar-ā kyā hogā
ishq kā haq bhī adā ham se kahāñ hotā hai

sukūt-e-ġham kī adā adā ko samajh sakeñ kaash ahl-e-ālam
ishāra-hā-e-latīf bhī haiñ jabīñ pe naqsh-e-shikan se pahle

jo ho maqbūl us kī bārgāh-e-haq-adā meñ
vo ik lamha 'riyāz' aadhe se aadhā chāhte haiñ

dasht aise gulshan meñ gul pe gul khilāne kī har adā mubārak ho
nannhe-munhe ġhunchoñ se ḳhud-kushī karāne kā mashġhala mubārak ho

lahū kī chhīñT tak qātil ke dāman par nahīñ koī
taḌapne kī adā aisī baḌī mushkil se aatī hai

luuTā hai mujhe us kī har adā ne
andāz ne naaz ne hayā ne

chhā.ī hai qayāmat kī ghaTā dekhiye kyā ho
barse to barasne kī adā dekhiye kyā ho

hāl-e-dil mujh se na pūchho mirī nazreñ dekho
raaz dil ke to nigāhoñ se adā hote haiñ

mire nāseh mujhe samjhā rahe haiñ
farīza hai adā farmā rahe haiñ