Tags-Ada

ham us kī har adā par roz par phailā.e aate haiñ
nazar ke jaal meñ pāband jo sayyād kartā hai

vo chehra haath meñ le kar kitāb kī sūrat
har ek lafz har ik naqsh kī adā dekhūñ

kuchh is adā se vo mere dil-o-nazar meñ rahā
ba-qaid-e-hosh bhī maiñ ālam-e-digar meñ rahā

añgḌā.ī ye kis ne lī adā se
kaisī ye kiran fazā meñ phūTī

apnī palkoñ par liye phirtā rahā nīñdoñ kā bojh
chand ḳhvāboñ kā adā mujh se na ḳhamyāza huā

āstāñ bhī koī mil jā.egā ai zauq-e-niyāz
sar salāmat hai to sajda bhī adā ho jā.egā

matā-e-dīn-o-dānish luT ga.ī allāh-vāloñ kī
ye kis kāfir-adā kā ġhamza-e-ḳhūñ-rez hai saaqī

vo jis ko duur se dekhā thā ajnabī kī tarah
kuchh is adā se milā hai ki dostāna lage

mehr yā qahr tire chāhne vaale ke liye
har adā jaan se pyārī hai tujhe kyā mālūm

kis naaz kis adā se nasīm-e-sahar chalī
bū kī tarah ravāñ huī misl-e-nazar chalī

mere pahlū se vo guzrā magar is tarah ki chehre pe thā haath
ek mīThī sī ḳhalish chhoḌ ga.ī dil meñ ye jāñ-soz adā

jin se baḌh kar koī nazroñ kā shanāsā bhī nahīñ
haa.e vo lamha-e-parāñ vo dil-āvez adā

nigah se chashm se nāz-o-adā se
ḳhudā mahfūz rakkhe har balā se

husn-e-ḳhūbī-e-butāñ kuchh na adā ho ba-ḳhudā
kiije gar laakh baras tak ye bayāñ aaTh pahar

kaun sī baat thī kyā tarz-e-adā thī 'anjum'
naqsh aisā huā dil par ki miTā.e na bane

vo dushman hī sahī yaaro hamārā
par us kī jo adā thī kyā adā thī

tire nāz-o-adā ko tere dīvāne samajhte haiñ
haqīqat sham.a kī kyā hai ye parvāne samajhte haiñ

jis kī adā adā pe ho insāniyat ko naaz
mil jaa.e kaash aisā bashar DhūñDte haiñ ham

harf o lab se hotā hai kab adā har ik mafhūm
be-zabān āñkhoñ kī guftugū bhī samjhā kar

vo ḳhush-libās bhī ḳhush-dil bhī ḳhush-adā bhī hai
magar vo ek hai kyuuñ us se ye gila bhī hai