Tags-Ada

ik adā ma.asūmiyat aur ek tohmat ma.asiyat
kab talak bachte raheñge ham kidhar jā.eñge aap

mujh aah kī garmī siiñ jhaḌe phuul chaman ke
ai sarv-e-gulistān-e-adā baaġh meñ jā dekh

jis roz se aayā hai ye qātil kī nazar meñ
us roz se jhukne kī adā bhuul gayā sar

jo had-e-taqvā adā na hove to apnā maz.hab yahī hai 'ġhālib'
havas na rah jaa.e koī baaqī gunāh kiije to ḳhuub kiije

khajūrī choTī adā meñ moTī jafā meñ lambī vafā meñ chhoTī
hai aisī khoTī ki dil har ik kā har ek laT meñ laTak rahā hai

be-talab baḌhtā rahā har lamha qarz-e-jāñ kā bojh
be-sabab hī har nafas ḳhud ko adā karte rahe

ik musalsal jañg thī ḳhud se ki ham zinda haiñ aaj
zindagī ham terā haq yuuñ bhī adā karte rahe

vo sub.h-e-īd kā manzar tire tasavvur meñ
vo dil meñ aa ke adā tere muskurāne kī

kitnī sharmīlī lajīlī hai havā barsāt kī
miltī hai un kī adā se har adā barsāt kī

dushman ke ghar se chal ke dikhā do judā judā
ye bāñkpan kī chaal ye nāz-o-adā kī hai

lutf-e-bedād hayā ġhussa taġhāful shoḳhī
rañg kyā kyā na talavvun ne adā ke badle

ye adā aap meñ sarkār kahāñ thī pahle
ye nazar aap kī talvār kahāñ thī pahle

chobīñ ghoḌā apnā kirdār umdagī se adā kartā hai
agar ġhā.eb savār apne hisse kā kaam nahīñ bhūltā

yuuñ ham apne ghar se nikle ghar ham ko taktā hī rahā
ham ne adā bhīgī āñkhoñ se qarz-e-dar-o-dīvār kiyā

kyā kahūñ Dar ye hai vo lailā-adā rusvā na ho
varna majnūñ se bhī kuchh baḌh kar merā afsāna na thā

usī ke lams se āb-o-havā badaltī hai
tamām manzar-e-jāñ ik adā pe Thahrā hai

mere kufr-e-ishq meñ thī ek īmānī adā
us ke kāfir husn meñ ik ishva-e-turkāna thā

adā lailā kī Tonā ToTkā hai
mohabbat qais kī jādūgarī hai

lahje se na zāhir ho ki ham us se ḳhafā haiñ
jiine kī abhī tak ye adā hī nahīñ aa.ī

husn kyā husn kī adā kyā hai
us ke jalvoñ kā dekhnā kyā hai