Tags-Khudi

us kā milnā hai apne khone par
fil-haqīqat ḳhudā ḳhudī meñ nahīñ

sad ma.arka-e-nūr-o-ziyā dil ko hai darpesh
ye merī ḳhudī kitnī ḳhud-āvez rahī hai

ham se hogā na kabhī apnī ḳhudī kā saudā
ham agar dil se utarte haiñ utar jaane do

maza to jab hai 'yagānā' ki ye dil-e-ḳhud-bīñ
ḳhudī ke nashe meñ be-gāna-e-ḳhumār rahe

ġham haiñ āshob-e-ḳhudī meñ hameñ varna ik shahr
ḳhuuñ se tar shor se ābād hamāre liye hai

kuchh to ḳhudī kā rañg hai kuchh be-ḳhudī kā rañg
donoñ kā imtizāj hai ye zindagī kā rañg

maane na maane koī pa itnā kaheñge ham
hai zauq-e-be-ḳhudī to muqarrar sharāb meñ

din raat mai-kade meñ guzartī thī zindagī
'aḳhtar' vo be-ḳhudī ke zamāne kidhar ga.e

dariyā-e-be-ḳhudī ko bhañvar der se milā
paanī ko sāhiloñ kī ḳhabar der se milī

anā kā nashsha ḳhudī kā ḳhumār TūTtā hai
mohabbatoñ meñ ḳhud apnā hisār TūTtā hai

vo mirā kaif-e-nazar vo be-ḳhudī vo sarḳhushī
fursat-e-nazzāra-hā-e-husn-e-jānāñ haa.e haa.e

be-ḳhudī ne na kahīñ kā rakkhā
ham haiñ bastī meñ na vīrāne meñ

vahshat kahāñ ki be-ḳhudī inshā kare koī
hastī ko lafz-e-m.ani-e-anqā kare koī

diyār-e-be-ḳhudī hai apne haq meñ gosha-e-rāhat
ġhanīmat hai ghaḌī bhar ḳhvāb-e-ġhaflat meñ basar honā

be-ḳhudī meñ bhī ḳhayāl-e-husn-e-ḳhuddārī rahe
naġhma-zan ho 'rāz' rañg-e-bazm-e-ġhurbat dekh kar

na vo baaġh haiñ na ghaTā.eñ haiñ na vo phuul haiñ na fazā.eñ haiñ
na vo nik.hateñ na havā.eñ haiñ na vo be-ḳhudī kā samāñ rahā

umr jo be-ḳhudī meñ guzrī hai
bas vahī āgahī meñ guzrī hai

merī hastī ajiib hai yā-rab ab mujhe ḳhud pe iḳhtiyār nahīñ
ālam-e-be-ḳhudī meñ jiitā huuñ maiñ ġham-e-āshiqī meñ martā huuñ

kahte haiñ jis ko maut hai ik be-ḳhudī kī niiñd
us ko fanā kahāñ hai jo tujh par fanā huā

tumheñ mālūm hai vo be-ḳhudī kā kaisā aalam thā
mire hoñToñ meñ jaltī paTriyāñ bhī muskurātī thiiñ