Tags-Khudi

be-ḳhudī kā hai jahāñ be-asar naaz o niyāz
sarkashī bhī na chale sar bhī jhukā.e na bane

ye kaun sā maqām hai ai josh-e-be-ḳhudī
rasta batā rahā huuñ har ik rahnumā ko maiñ

be-ḳhudī pe thā 'fānī' kuchh na iḳhtiyār apnā
umr bhar kiyā nāhaq ham ne intizār apnā

har nafas nārā-e-ḳhudī kyuuñ hai
itnā ehsās-e-kamtarī kyuuñ hai

shab-e-vasl kī be-ḳhudī chhā rahī hai
kaho to sitāroñ kī sham.eñ bujhā deñ

tire vasl kī be-ḳhudī kah rahī hai
ḳhudā.ī to kyā ham ḳhudā ko bhulā deñ

ibādat hai ik be-ḳhudī se ibārat
haram ko mai-e-mushk-bū se basā deñ

nikālūñ armān kyuuñ na jī ke ki mast hoñ jām-e-ishq pī ke
maiñ sadqe is apnī be-ḳhudī ke ki dauḌ kar vo sambhālte haiñ

maiñ kitne ash.ār likh ke kāġhaz pe phaaḌ detā huuñ be-ḳhudī meñ
mujhe pata hai maiñ azhdahā ban ke apne bachche nigal rahā huuñ

āvāz de rahe the jise be-ḳhudī meñ ham
dekhā to vo hameñ the koī dūsrā na thā

but-kade se mai-kada achchhā mirā
be-ḳhudī achchhī ḳhudī achchhī nahīñ

tār-e-malbūs-e-ḳhudī kyuuñ raheñ baaqī mere
panja-e-dast-e-junūñ apnā hai vahshat apnī

ḳhudī kyā aur ḳhudī kā mudda.ā kyā
jo banda hai banegā vo ḳhudā kyā

koī mast-e-mai-kada aa gayā mai-e-be-ḳhudī vo pilā gayā
na sadā-e-naġhma-e-dair uThī na haram se shor-e-azāñ uThā

pahuñchā hī diyā kisī galī tak
allāh-re zor be-ḳhudī kā

safha-e-hastī pe likkhā be-ḳhudī meñ ek naam
saañs lene kā sabab vo ban gayā mere liye

jitne apnī ḳhudī se duur hue
utne un se qarīb haiñ ham log

achchhā huā ki yaad tū aayā hai āḳhirash
is be-ḳhudī meñ bhuul gayā thā 'haqīr' huuñ

ḳhudā.ī kī qudarat ḳhudī se hai 'markaz'
muqallid haiñ jab tak asīrī rahegī

ba-qadr-e-paimāna-e-taḳhayyul surūr har dil meñ hai ḳhudī kā
agar na ho ye fareb-e-paiham to dam nikal jaa.e aadmī kā