Tags-Khudi

elān-e-be-ḳhudī hai har ik qatra-e-lahū
mere junūñ kī had rasan-o-dār bhī nahīñ

ḳhudā se lau lagā.eñ yā ḳhudā.ī se rahe rishta
faqat apnī ḳhudī kā ehtirām achchhā nahīñ lagtā

ḳhudī kī shoḳhī o tundī meñ kibr-o-nāz nahīñ
jo naaz ho bhī to be-lazzat-e-niyāz nahīñ

nigāh-e-yār mirī samt phir uThī hogī
sambhal sakūñgā na maiñ aisī ye be-ḳhudī hogī

nahīñ hai be-ḳhudī hī kī tamannā ham ko ai saaqī
tire mastoñ kā sadqa kuchh zarā sā ghūñT-bhar itnā

miTā kar dil se pindār-e-ḳhudī insāf se dekho
ki be-zauq-e-tamannā hastī-e-bīm-o-rajā kyā hai

be-ḳhudī hai ajiib shai 'ādil'
ret meñ machhliyāñ pakaḌtī hai

'barqī' jo ḳhud-shanās hai vo hai ḳhudā-shanās
gum-gashtagī-e-hosh-o-ḳhirad be-ḳhudī nahīñ

vāqa.ī bolne se apne laḌā baiThe jo aañkh
kyuuñ ḳhudī se na kare pher vo rum yā ma.abūd

lazzat-kash-e-nazāra hai terī nazar to kyā
itnī to be-ḳhudī ho ki hairat kaheñ jise

haañ kaif-e-be-ḳhudī kī vo saa.at bhī yaad hai
mahsūs kar rahā thā ḳhudā ho gayā huuñ maiñ

hameñ apnī zad meñ hī rahnā paḌegā ḳhudī ko ḳhudī meñ Dubonā paḌegā
na aape se bāhar tū aanā samundar samundar ko samjhā rahe haiñ kināre

niyāz-e-be-ḳhudī behtar namāz-e-ḳhud-numā.ī siiñ
na kar ham puḳhta-maġhzoñ siiñ ḳhayāl-e-ḳhām ai vaa.iz

bahut nuqsān kartī hai ḳhudī kā
anā kā ruḳh agar moḌā na jaa.e

ham apnī be-ḳhudī meñ ghar kā naqsha bhuul baiThe haiñ
kahāñ hai tāq-e-nisyāñ jis pe tashvīsh-e-ziyāñ rakh dī

be-ḳhudī hai hasratoñ kī bhiiḌ chhaT jaane ke ba.ad
aap hī gum ho ga.e ham rāsta paane ke ba.ad

kisī kī lauh-e-jabīñ par shikan ye kahtī hai
ki be-ḳhudī meñ koī raaz kah gayā huuñ maiñ

thī havā-e-ḳhudī bharī is meñ
kyuuñ na be-ḳhud habāb ho jaatā

hosh vāloñ ko ḳhabar kyā be-ḳhudī kyā chiiz hai
ishq kiije phir samjhiye zindagī kyā chiiz hai

ai hūr-e-bāġh itnī ḳhudī se na kaam le
uḌ kar shamīm-e-gul kahīñ āñchal na thaam le