Tags-Khushi

ḳhushī merī gavāra thī na qismat ko na duniyā ko
so maiñ kuchh ġham barā-e-ḳhātir-e-ahbāb uThā laa.ī

tirī barāt meñ din bhar yahī ḳhayāl rahā
ki is ḳhushī kā asar tere dil pe kyā hogā

nasīb hoñgī use kāmyābiyāñ 'nazmī'
ḳhushī ke saath jo har imtihāñ se guzregā

jo na ho dard-āshnā vo sarḳhushī kis kaam kī
shā.irī tamsīl yā sūrat-garī kis kaam kī

vo masarratoñ kā hujūm kyā jo tavāf-e-ishq-o-tarab kare
vo ḳhushī jo auroñ ko de sakūñ mujhe us ḳhushī kī talāsh hai

mire ġhanīm-e-surḳh-rū arsa-e-sad-shikast meñ
koī naved-e-sar-ḳhushī merī sipāh ke liye

hunar kaho ki karāmat magar yahī hai ki ham
ḳhushī ko Dhaal bhī sakte haiñ ġham kī sūrat meñ

ye ġham-kada hai is meñ 'mubārak' ḳhushī kahāñ
ġham ko ḳhushī banā koī pahlū nikāl ke

shahr-e-aġhyār sahī itnī ḳhushī kyā kam hai
ham ne dekhā tujhe aur anjuman-ārā dekhā

bahut malāl hai tujh ko na dekh paane kā
bahut ḳhushī hai tirī raah se guzarne kī

tamām shahr hai ik mīThe bol kā saa.il
hamārī jeb se haañ ye ḳhushī nikaltī hai

takmīl-e-ārzū kī ḳhushī aur ġham-e-hayāt
donoñ hī ibtidā se rahe intihā ke saath

hamārī holī hai eid hai vo har ik ḳhushī kī umiid hai vo
vo paas aa.e to us se pūchheñ tū itne din se kahāñ thā pahle

ham haiñ aur un kī ḳhushī hai āj-kal
zindagī hī zindagī hai āj-kal

musalsal chalte rahne kī ḳhushī meñ leT jaatī hai mohabbat ghaas meñ
patthar kī sil par yādgārī sīḌhiyoñ ke beach

huī jo raat pahlū meñ ḳhushī se mar ga.e ham to
agar tere hī āñgan meñ sahar hotī to kyā hotā

mujhe 'ibrat' ḳhushī is baat kī hai
tirā maslak rivāyātī nahīñ hai

ḳhushī merī gavāra thī na qismat ko na duniyā ko
so maiñ kuchh ġham barā-e-ḳhātir-e-ahbāb uThā laa.ī

ḳhushī dāman-kashāñ hai dil asīr-e-ġham hai barsoñ se
hamārī zindagī kā ek hī aalam hai barsoñ se

ḳhushī hai ai 'vaqār' ab aur na armān-e-ḳhushī baaqī
agar kuchh hai to bas āsūdgi-e-ġham hai barsoñ se