Tags-Khushi

dukhoñ ke ḳheme meñ baiTh kar
nā-rasā ḳhushī kī ḳhushī meñ hañsnā

gila kareñ bhī to kis se vo nā-murād-e-junūñ
jo ḳhud zavāl kī jānib baḌī ḳhushī se ga.e

ma.āl-e-naġhma-o-mātam faroḳht hotā hai
ḳhushī ke saath yahāñ ġham faroḳht hotā hai

pahnāne vaale agar beḌiyāñ pahnā.eñge
ḳhushī se qaid ke goshe ko ham basā.eñge

kabhī 'anjum' vo bhī din aa ga.e ki ḳhushī kī bazm sajā.eñge
ye tamannā jo mere dil meñ thī vo yūñhī dharī kī dharī rahī

kise maiñ DhūñDhtī apnī ḳhushī meñ
tumhāre ġham se fursat hī nahīñ thī

is ḳhushī meñ hinā lagāte haiñ
ki mirā ḳhuuñ bahā.e baiThe haiñ

ham nahīñ aap meñ ḳhushī se ki vo
ghar meñ mehmān aa.e baiThe haiñ

kisī ko jaan dene par masarrat
kisī ko jaan lene kī ḳhushī hai

'farhat' kī har hañsī meñ haiñ aañsū chhupe hue
us kī ḳhushī bhī oḌhe hue hai ridā-e-ġham

saudā-e-ishq dard-e-mohabbat jafā-e-dost
ham ne ḳhushī ke vāste kyā kyā uThā.e ġham

kab apnī ḳhushī se vo aa.e hue haiñ
mire jazb-e-dil ke bulā.e hue haiñ

laa.ī hayāt aa.e qazā le chalī chale
apnī ḳhushī na aa.e na apnī ḳhushī chale

vo laḌkī kitnī haqīqat-pasand thī 'ammār'
hañsī-ḳhushī se jo ḳhud dāstān ho rahī thī

kyā karūñ rañj gavārā na ḳhushī raas mujhe
jiine degī na mirī shiddat-e-ehsās mujhe

jaise us kā kabhī ye ghar hī na thā
dil meñ barsoñ ḳhushī nahīñ aatī

ḳhushī ke ba.ad ġham kā sāmnā honā qayāmat hai
jo ġham ke ba.ad hāsil ho vo albatta ḳhushī achchhī

ziyāda ai falak de rañj-o-rāhat ham ko jo kuchh de
na do din kā ye ġham achchhā na do din kī ḳhushī achchhī

rāh-e-hayāt meñ na milī ek pal ḳhushī
ġham kā ye bojh dosh pe sāmān sā rahā

vo ta.alluq hai tire ġham se ki allāh allāh
ham ko hāsil ho ḳhushī bhī to gavārā na kareñ