Tags-Khushi

qillat-e-ashk ab kabhī hogī na umr bhar hameñ
ham ne ḳhushī ke shauq meñ itne to ġham kamā liye

maiñ huuñ ek āshiq-e-be-navā tū navāz apne payām se
ye tirī razā pe tirī ḳhushī tū pukār le kisī naam se

Dāliyoñ pe phudakne se jo mil ga.ī
us ḳhushī ke liye kyuuñ falak par uḌeñ

alam to ḳhair alam hai ki pā.edār nahīñ
vabāl hai jo ḳhushī bhī gurez-pā na lage

sharm to aa.ī lekin ḳhushī bhī huī
apnā dukh us ke chehre pe paḌhte hue

kalkatte ne nābūd kiyā ḳhvāb-e-ḳhushī ko
pal-bhar mujhe is shahr meñ rāhat nahīñ aatī

sabr-o-taslīm hī ke andar rah
umr rañj-o-ḳhushī se bāhar kaaT

rāh-e-vafā meñ ham ko ḳhushī kī talāsh thī
do gaam hī chale the ki har gaam ro paḌe

jo aa ga.ī kabhī sar dene kī ghaḌī ai dost
ḳhushī ḳhushī tire dīvāne sū-e-dār chale

ḳhushī se jo uchhlā hai ḳhargosh to
abhī tak uchhal kar hī chaltā hai vo

haath se mere vo piitā nahīñ muddat se sharāb
yaaro kyā apnī ḳhushī maiñ ne pilānā chhoḌā

har ḳhushī meñ ġham kā ik pahlū milā
har na.e ġham se ḳhushī hone lagī

un ke aane kī ḳhushī kyā chiiz thī
is ḳhushī se aur ġham paidā huā

ḳhushī terā muqaddar hogī 'aḳhtar'
ye imkāñ ab ḳhayāl-o-ḳhvāb se haiñ

terī zulfoñ kī chhāñv meñ rah kar
aane vaalī ḳhushī se Dartā huuñ

vo shai kahāñ hai pinhāñ ai mauj-e-āb-e-haivāñ
jo vaj.h-e-sar-ḳhushī thī barsoñ kī tishnagī meñ

ye ġham nahīñ ki mirā āshiyāñ rahā na rahā
ḳhushī ye hai ki yahīñ barq be-amāñ Thahrī

ḳhushī meñ hans nahīñ sakte ye ġham ki ġham bhī nahīñ
hamāre karb anokhe aziyyateñ bhī na.ī

kaho kāfiroñ se kareñ ḳhushī ki ye mas.ala hai tanāsuḳhī
mire naale ḳhaak meñ jab mile to subū ke dast-e-duā hue

mubārak mubārak nayā saal aayā
ḳhushī kā samāñ saarī duniyā pe chhāyā