Tags-Khushi

abhī udāsiyāñ ḳheme lagā.e baiThī haiñ
abhī to dil meñ ḳhushī kā paḌāv mushkil hai

oḌh kar baiTh ga.ī huuñ maiñ dukhoñ kī chādar
ye ḳhushī aur ye ḳhushbu-e-qabā tum rakh lo

dukh dard meñ hamesha nikāle tumhāre ḳhat
aur mil ga.ī ḳhushī to uchhāle tumhāre ḳhat

apne ahbāb kī ḳhushī ke liye
bilā-irāda bhī muskurā.e haiñ

tā-sub.h mujh ko maare ḳhushī ke na aa.ī niiñd
ik aisī baat vo mujhe samjhā ke so rahe

dil jalāyā tirī ḳhushī ke liye
yā ḳhud apnī hī āgahī ke liye

nazar merī tire māthe kī silvaT pe hī rahtī hai
ḳhushī merī isī silvaT pe aa kar TuuT jaatī hai

fart-e-ḳhushī meñ aañkh se aañsū nikal paḌe
jab un kā iltifāt gavārā na ho sakā

ye kaun le gayā chun chun ke shāḳh-e-gul kī ḳhushī
kahāñ vo phuul jo ham gulsitāñ se māñgte haiñ

maiñ sukūñ huuñ ḳhushī bhī huuñ 'sarhad'
kaun kahtā hai ġham-zada huuñ maiñ

junūñ ā.ina-dār-e-soz-e-darūñ
junūñ par ḳhushī kī navāzish nahīñ

mujhe apne dil kā vo raaz de jo ḳhushī se mujh ko navāz de
vo jo mujh meñ ruuh sī phūñk de kisī roz aisā kalām kar

maiñ muskurātā magar dī na ashk ne mohlat
ḳhushī jab ek milī saath ġham hazār mile

jo duā thī vo be-asar Thahrī
har ḳhushī itnī muḳhtasar Thahrī

ham nahīñ jānte haiñ hashr meñ kyā kyā hogā
ye ḳhushī hai ki vafā va.ada-e-fardā hogā

sumoñ-tale rauñd de ḳhushī se magar ye sun le
gunāh ai shahsavār! maiñ ne nahīñ kiyā thā

ziist ke dard kā ehsās kabhī miT na sakā
sin ḳhushī ke bhī kaTe ik ġham-e-be-nām ke saath

aañsū nikal paḌe haiñ ḳhushī meñ tire huzūr
kis tamkanat ke saath ye dariyā ravāñ huā

sarḳhushī mere liye asbāb-e-ġham mere liye
maujzan hai jaise dariyā-e-karam mere liye

jo aa.e jis ke jī meñ 'dard' kah le
sunūñgā har kisī kī maiñ ḳhushī se