Tags-Khushi

ik taraf merī anā hai ik taraf terī ḳhushī
aa gayā mere liye pal imtihānī ho na ho

kabhī vo rañj ke sāñche meñ Dhaal detā hai
kabhī ḳhushī vo mujhe be-misāl detā hai

rāhat-e-dārain meñ bhī vo ḳhushī mafqūd hai
jis ḳhushī se maiñ ne jhelīñ āfateñ tere liye

barf meñ dabā makkhan maut rail aur rickshaw
zindagī ḳhushī rickshaw rail motareñ Dolī

ḳhushī sī kis ne hamesha malāl meñ rakkhī
ḳhushī meñ kis ne hamesha malāl sā rakkhā

har lamha-e-sar-ḳhushī meñ aksar
do ashk bahā ke rah gayā huuñ

ye siina jis meñ ye daaġh meñ ab masarratoñ kā kabhī thā maḳhzan
vo dil jo armān se bharā thā ḳhushī se us meñ Thahar chukā hai

masarratoñ ko ye ahl-e-havas na kho dete
jo har ḳhushī meñ tire ġham ko bhī samo dete

chaman kā zikr kyā ab to ḳhudā ko yaad karte haiñ
ḳhushī sayyād ko hotī hai jab fariyād karte haiñ

kuchh is tarah se basar kī hai zindagī maiñ ne
ġhamoñ kī chhāñv meñ DhūñDī hai sarḳhushī maiñ ne

ḳhushī ke ḳhvāb sajātā zarūr huuñ lekin
saf-e-malāl ko sīdhā bhī maiñ hī kartā huuñ

raḳht bāñdhā na kis andoh o ḳhushī ne dil se
ik tire ġham hī kā is ghar se aTālā na gayā

giraftārī kī lazzat aur nirā āzād kyā jaane
ḳhushī se kāTnā ġham kā dil-e-nāshād kyā jaane

kuchh ġham firāq kā hai na kuchh vasl kī ḳhushī
huuñ us ke zauq-o-shauq meñ masrūr raat din

ġhazab meñ jaan hai kyā kiije badla rañj-e-furqat kā
badī se kar nahīñ sakte ḳhushī se ho nahīñ saktā

mohabbat meñ kare kyā kuchh kisī se ho nahīñ saktā
mirā marnā bhī to merī ḳhushī se ho nahīñ saktā

qubūl añdherā ḳhushī se koī nahīñ kartā
kise nahīñ hai bhalā raushnī se dilchaspī

muāmlāt kiye jaa.eñ ab sipurd un ke
muāmlāt meñ jo leñ ḳhushī se dilchaspī

intihā-e-ishq hai kaisī jafā kaisā gila
ab to un kī har ḳhushī apnī ḳhushī hone lagī

hue jo mānūs kaj-ravī se phire rah-e-sidq-o-rāstī se
na baiThe ik roz vo ḳhushī se na kuchh ba-juz intishār dekhā