Tags-Khushi

yuuñ zindagī guzar rahī hai merī
jo un kī hai vahī ḳhushī hai merī

lo phir hamārī eid aa ga.ī hai
har ek ḳhush hai ghar ghar ḳhushī hai

jo dil ko bose ke badle diije to hañs ke lailā bahut ḳhushī se
jo bosa māñgo to phir ye naqshā kabhī to aaj aur kabhī kahe kal

is jabr kā ai ahl-e-jahāñ naam koī hai
kulfat meñ bhī ārām hai ġham meñ bhī ḳhushī hai

vo ek ġham ki sahārā thā zindagī ke liye
bhulā rahā huuñ use bhī tirī ḳhushī ke liye

ḳhushī se us kī tum dhoka na khānā
pareshānī meñ vo hañstā bahut hai

kis ḳhushī kī ḳhabar sunā ke mujhe
ġham kā putlā banā diyā tū ne

tire va.ade par jiye ham to ye jaan jhuuT jaanā
ki ḳhushī se mar na jaate agar e'tibār hotā

ḳhushī hai sab ko roz-e-eid kī yaañ
hue haiñ mil ke bāham āshnā ḳhush

mere ghar aa.ī thī ḳhushī lekin
jā ke mehmān tere ghar Thahrī

ḳhushī mahsūs kartā huuñ na ġham mahsūs kartā huuñ
magar haañ dil meñ kuchh kuchh zer-o-bam mahsūs kartā huuñ

ḳhushī kī mujh ko ab bahzād kuchh hājat nahīñ baaqī
ki ġham ko bhī maiñ ab un kā karam mahsūs kartā huuñ

ḳhushī kī aañkh meñ aañsū kī bhī jagah rakhnā
bure zamāne kabhī pūchh kar nahīñ aate

gaahe gaahe bas ab yahī ho kyā
tum se mil kar bahut ḳhushī ho kyā

ham ġham-zada haiñ laa.eñ kahāñ se ḳhushī ke giit
deñge vahī jo pā.eñge is zindagī se ham

guzārī thiiñ ḳhushī kī chand ghaḌiyāñ
unhīñ kī yaad merī zindagī hai

vo ḳhālī-pan hai kahīñ kuchh kashish nahīñ hai mujhe
koī ḳhushī hai bahut aur na ġham ziyāda hai

zindagī ko zindagī kī kuchh ḳhushī hāsil sahī
dard-e-mahrūmī sahī yā soz-e-dard-e-dil sahī

muskurāhaT ho yā aa.heñ yā ḳhushī ke aañsū
har ik ehsās kī lazzat meñ samāyā hai tū

ik ajab sarḳhushī nigāh meñ hai
jaise tū phir se merī chaah meñ hai