Tags-Khushi

ḳhushī isī meñ agar hai to har ḳhushī le lo
ye dukh ye dard ye huzn-o-malāl mat chhīno

ḳhushī jo ġham se mil ga.ī to phuul aag ho ga.e
junūn-e-bandagī ne ḳhud-nigāh kar diyā mujhe

kisī ḳhushī ko nahīñ hai agar sabāt yahāñ
maiñ sochtā huuñ ki ġham jāvedāñ banā.ūñ koī

ḳhushī kā jashn ho yā mātam-e-marg-e-tamannā ho
yahāñ har haal meñ ḳhalq-e-ḳhudā ḳhāmosh rahtī hai

kyuuñ hāth-pāoñ mere ḳhushī se na bhuul jaa.eñ
uñglī chubove haath meñ jab vo milā ke haath

ye kah ke dil ne mire hausle baḌhā.e haiñ
ġhamoñ kī dhuup ke aage ḳhushī ke saa.e haiñ

ḳhushī kyuuñ na ho qatl hone kī mujh ko
vo nā-mehrbāñ mehrbāñ ho rahā hai

dam bhar kī ḳhushī bā.is-e-āzār bhī hogī
is raah meñ saaya hai to dīvār bhī hogī

kyā 'nisār' āj-kal koī lamha
aap se bhī ḳhushī se miltā hai

har ḳhushī kī mahfil meñ qahqahe luTāte haiñ ḳhud hī lūTte bhī haiñ
ġham kī majlisoñ meñ bhī sab kā apnā apnā sar apnā apnā shāna hai

rone-dhone se nahīñ ugtā ḳhushī kā sūraj
qahqahe hoñT pe bolūñ to siyah raat kaTe

kyā kaheñ jab vo milte haiñ tanhā
un se ham kis ḳhushī se milte haiñ

ḳhushī kī baat bhī ab sogvār kartī hai
vo mehrbān bhī ab ho to is se kyā hāsil

dukhoñ ko apne chhupātā huuñ maiñ dafīnoñ sā
magar ḳhushī ko hama-gīr kartā rahtā huuñ

dil pe taarī hai ik kamāl-e-ḳhushī
shāyad apne zavāl kī hogī

ġham-zada zindagī rahī na rahī
ḳhush rahe ham ḳhushī rahī na rahī

ḳhushī thī chehre pe lekin koī na jaan sakā
ḳhushī ke pīchhe bahut pur-malāl thā koī

maqām-e-zabt ġham-e-ishq meñ vo paidā kar
ki tū ḳhushī ko na tarse tujhe ḳhushī tarse

ye kis se chāñdnī meñ ham ba-zer-e-āsmāñ lipTe
ki bāham arsh par maare ḳhushī ke qudsiyāñ lipTe

faqat ik shaġhl bekārī hai ab bāda-kashī apnī
vo mahfil uTh ga.ī qaa.em thī jis se sarḳhushī apnī