Tags-Khushi

dostoñ maiñ andhā huuñ ye ḳhushī bhī kam hai kyā
us ne merī āñkhoñ se ghar meñ raushnī kar lī

hai ḳhushī bhī ajiib shai lekin
ġham baḌe dil-pazīr hote haiñ

mirī ḳhushī kā zamāna havā kā jhoñkā thā
mire ġhamoñ kī rahī zindagī darāz bahut

hamāre nākām tajraboñ kī kisī ko koī ḳhushī nahīñ thī
hameñ buzurgoñ kī rā.egānī kā ġham nahīñ hai to kyā ġhalat hai

hañsī ke saath bhī aañsū nikal aate haiñ āñkhoñ se
ḳhushī to merī qismat meñ barā.e-nām hai shāyad

maanā ki mirā luT gayā sarmāya ḳhushī kā
ik dard kī daulat to abhī mere qarīñ hai

pāgal hue jaate ho 'farāz' us se mile kyā
itnī sī ḳhushī se koī mar bhī nahīñ jaatā

ḳhushī huī hai aaj tum ko dekh kar
bahut nikhar sañvar ga.e ho ḳhush raho

dil ho pazhmurda to hai ḳhanda-e-gul be-ma.anī
har ḳhushī aur ġhamī dil ne chhupā rakkhī hai

na ho muḳhil mire andar kī ek duniyā meñ
baḌī ḳhushī se bar-o-bahr par hukūmat kar

ye ḳhayāl ḳhud hai aisā jo ḳhushī banā de ġham ko
ki hai ibtidā ḳhushī kī mire ġham kī intihā se

ḳhushī se kaun bhulātā hai apne pyāroñ ko
qusūr is meñ zamāne kā hai tumhārā nahīñ

chhalak jo uThtī hai ye aañkh fart-e-vasl meñ bhī
to sarḳhushī meñ abhī ranj-e-rā.egāñ koī hai

savād-e-shām-e-safar hai jalā jalā sā 'munīr'
ḳhushī ke saath ajab sā malāl bhī hai mujhe

'kañval' ḳhushī kī huā kartī hai yūñhī takmīl
ġham-e-hayāt ke har bahr-e-be-karāñ se guzar

hamīd asl meñ ik ġham ko hai sabāt yahāñ
jise davām nahīñ us ḳhushī se kyā lenā

ḳharāb-e-zīst huuñ lekin tirī ḳhushī ke sivā
tire nisār mujhe zindagī se kyā lenā

bhalā vo zindagī kyā zindagī hai
ḳhushī ke saath jis meñ ġham nahīñ hai

har roz ḳhushī hai shab-e-ġham se pāmāl
ḳhālī kā hai chāñd ba.ad shahr-e-shavvāl

ashk-e-gul-rañg nisār-e-ġham-e-jānāna kareñ
aaj terī hī ḳhushī ai dil-e-dīvāna kareñ