Tags-Khwab

patthar na banā de mujhe mausam kī ye saḳhtī
mar jaa.eñ mire ḳhvāb na ta.abīr ke Dar se

kal raat mere ḳhvāb meñ chūme the us ne lab
shāyad ye us ke lams kā mujh par nikhār hai

vo ḳhvāb jo barsoñ se na chehra na badan hai
vo ḳhvāb havāoñ meñ bikhar kyuuñ nahīñ jaatā

ik ḳhvāb-numā tamsīl kā dhundlā aks hai ā.īna-ḳhāne meñ
vo husn dikhā.ī nahīñ detā aur phir bhī nigāh nahīñ haTtī

ḳhvāb chuntī huī āñkheñ haiñ parindoñ kī tarah
aur ye jism ki jaise koī be-barg shajar

haiñ is shikast meñ ḳhalq-e-jadīd ke asrār
haqīqat aaj bhī ham-rāh-e-ḳhvāb TūTtī hai

rañj likkhā hai nasīboñ meñ mire rāhat se
ḳhvāb meñ bhī havas-e-yār liye phirtī hai

ham logoñ ko ḳhvāb dikhā kar manzil kā
raste ke āġhāz meñ rakkhā jaatā hai

āḳhir-e-shab jo ḳhvāb dikhā.ī dete hoñ
'az.har' un ko raaz meñ rakkhā jaatā hai

jo tabassum chhīn lete haiñ shab-e-mahtāb se
jin kī barnā.ī jagātī hai diloñ ko ḳhvāb se

ajab sā ik ḳhvāb dekh kar aañkh khul ga.ī hai
ham apne marne pe ro.e lekin mare nahīñ the

ba-rañg-e-ḳhvāb sahī saarī kā.enāt 'akbar'
vajūd-e-kul ko na andesha-e-gumān meñ lā

din ta.abīr mirī chaukhaT par lā kar rakh degā
raat ne terā ḳhvāb bunā hai āñkhoñ ke us paar

bas ik ḳhvāb kī mayyat hai aur mātam-dārī hai
ham ne jā kar dekh liyā hai āñkhoñ ke us paar

patthar ho kar rah jā.eñgī āñkheñ muuñd 'rabāb'
ab bhī us kā ḳhvāb paḌā hai āñkhoñ ke us paar

aao ye afvāh uḌā.eñ
ham ne ḳhvāb meñ dekhā dariyā

ab bhī rāteñ mirī mahaktī haiñ
ek din ḳhvāb meñ vo aatā thā

us kī ta.abīr bhalā kaun karegā 'sādiq'
jāgtī āñkhoñ ne jo ḳhvāb sajā rakkhā hai

yuuñ jāgte rahnā hai to āñkhoñ meñ hamārī
jo ḳhvāb chhupe haiñ nazar aane ke nahīñ haiñ

maiñ ne jab ḳhvāb nahīñ dekhā thā
tujh ko betāb nahīñ dekhā thā