Tags-Khwab

vaqt be-mehr hai is fursat-e-kamyāb meñ tum
merī āñkhoñ meñ raho ḳhvāb-e-mujassam kī tarah

itne be-rañg ujāloñ se nazar guzrī hai
hausla aañkh ko ab ḳhvāb-e-hasīñ kā na rahā

TuuTā koī sitārā thā yā ḳhvāb-e-ārzū
taa.ir qafas meñ raat bahut be-qarār thā

kab se baiThe haiñ mirī aañkh kī añgnā.ī meñ
ḳhvāb bachchoñ kī tarah shor machāne ke liye

judā judā sab ke ḳhvāb ta.abīr ek jaisī
hameñ azal se milī hai taqdīr ek jaisī

vo ḳhvāb thā yā safar aane vaale mausam kā
marī paḌī thī zamīñ zahr khā rahī thī havā

tamām ḳhvāb ḳhayālāt ban ke TuuTe haiñ
ye daur dekhiye ab kyā dikhāne vaalā hai

ma.alūm hai mujhe ki baḌā jurm hai ye kaam
maiñ ḳhvāb dekhtā huuñ mujhe maar dījiye

sitār-e-ḳhvāb se bhī baḌh kar ye kaun be-mehr hai ki jis ne
charāġh aur aa.ine ko apne vajūd kā rāz-dāñ kiyā hai

kyā yaqīñ aa.e mujhe hāl-e-bahisht-o-dozaḳh
maiñ huuñ jis ḳhvāb meñ sab us kī ye ta.abīreñ haiñ

ḳhvāb kā āḳhirī ḳhumār aañkh meñ hai kuchh intizār
niiñd zarā sā kaam hai kaam ke ba.ad kuchh nahīñ

tere ḳhvāb-e-girāñ par ai dil-e-nādāñ ta.ajjub hai
ki tū sotā rahe saarā jahāñ bedār ho jaa.e

shab-e-firāq ne mismār saare ḳhvāb kiye
koī to muzhda sunā.e ye din nikaltā huā

jaise har ik nafas nafas nok-e-sināñ liye hue
ishq kā ḳhvāb dekh le ishq kī zindagī na dekh

vasl kī shām-e-siyah us se pare ābādiyāñ
ḳhvāb daa.im hai yahī maiñ jin zamānoñ meñ rahūñ

bajā ki ḳhvāb haiñ lekin bahār kī rut meñ
ye tai hai ki ab ke hameñ bhī nihāl honā hai

ek hī samt har ik ḳhvāb chalā jaatā hai
yaad hai yā koī naqsh-e-kaf-e-pā hai mujh meñ

harī thī shāḳh to baiThā na us pe panchhī kyuuñ
lage hai ujḌe hue ḳhvāb sī ye bastī kyuuñ

us ke liye āñhkeñ dar-e-be-ḳhvāb meñ rakh duuñ
phir shab ko jalā kar unheñ mehrāb meñ rakh duuñ

sūrat hai yahī ab to guzarnā hai yūñhī vaqt
jis baat ko dil chāhe use ḳhvāb meñ rakh duuñ